"Son dövrlər bu sahədə bəzi internet resurslarında müəyyən problemlər qalır"
Cəbhədə baş verən gərginlik Azərbaycan və Ermənistan mediası arasında informasiya savaşının daha da qızışmasına yol açıb. Təəssüf ki, bəzən qeyri-peşəkarlıq əlamətləri də özünü büruzə verir. Bu xüsusən sosial mediaya aiddir. Bütövlükdə götürəndə, peşəkar media proseslərə fərqli yanaşır və öz işini daha yaxşı bilir.
O da məlumdur ki, son illər cəbhədə atəşkəs ermənilər tərəfindən 3 dəfə genişmiqyaslı formada pozulub və bu, böyük toqquşmalara səbəb olub. Hər üç halda baş verən hadisələr media tərəfindən işıqlandırılıb. Birinci dəfə 2014-cü ilin avqustunda cəbhədə ciddi toqquşmalar oldu. İkinci bənzər toqquşma 2016-cı ilin aprelində yaşandı. Nəhayət, 2017-ci il fevralın 25-də baş verən toqquşmalar medianın diqqət mərkəzində oldu. Hər üç halda ölkə mediasının bununla bağlı dövlətə dəstək verməsi özünü necə göstərdi? Məsələyə münasibət bildirən "Xalq Cəbhəsi" qəzetinin baş redaktoru Elçin Mirzəbəylinin sözlərinə görə, hər üç halda peşəkar media daha diqqətli davrandı: "Peşəkar media əksər hallarda dövlətin maraqlarından çıxış etdi. Düzdür, 2014-cü ildə bu sahədə neqativ hallar indikindən daha çox olsa da, sonrakı dövrdə bu sahədə vəziyyət düzəldi. Bu ən yüksək səviyyədə görülən tədbirlərdən sonra mümkün oldu. Son dövrlər bu sahədə bəzi internet resurslarında müəyyən problemlər qalır. Bu problemlərin də aradan qaldırılması ilə bağlı işlər gedir. Mətbuat orqanları, heç bir halda, düşmənin təxribat xarakterli materiallarının yayılmasına yol verməməlidir. Erməni KİV-in yaydığı məlumatlardan yalnız bir halda - analitik və təhlil xarakterli yazılar hazırlamaq, eyni zamanda Ermənistandakı mövcud psixoloji mühiti anlamaq və araşdırmaq üçün istifadə etmək olar. Azərbaycan ictimai rəyinə hesablanmış videomaterialların, foto və informasiyaların yayılması yolverilməzdir. Bu, birinci növbədə, cəbhədəki təxribatın davamı kimi qəbul edilməlidir. Bu məsələlərlə bağlı "dəyirmi masa"lar, toplantılar keçirilib, ən yüksək səviyyədə buna münasibət bildirilib. Media qurumları, xüsusilə də internet resursları belə məsələlərdə ehtiyatlı olmalı, rəsmi qurumların verdiyi məlumatlara əsaslanmalıdır".
Vidadi ORDAHALLI
