"Ötən 25 il ərzində Xocalı dərdini unutmayan, böyükdən-kiçiyə şəhid şəhərin adını qəlbində həmişə xatırlanacaq bir nisgil kimi daşıyan xalqımız dünənlə müqayisədə bu gün daha da mətinləşib, başımıza gətirilən faciələrdən sonra daha da müdrikləşib.
Qətliam, əslində biz azərbaycanıların gözünü qorxutmaqla yanaşı, milli kimliyimizi, ruhumuzu, düşüncəmizi öldürməyə yönəldilmişdi və bunu bu gün Ermənistanın rəhbərliyini təmsil edən şəxslərin özləri də etiraf edir. Monoetnik Ermənistanı "Dənizdən-dənizə" görmək istəyənlərin bir arzusu, bir hədəfi var: tarixi Azərbaycan torpaqlarını işğal etmək..."
Bu fikirləri Xətai Rayon Mühafizə İdarəsinin rəisi, polis polkovnik-leytenantı Nazim Həsənov Xocalı faciəsinin iyirmi beşinci ildönümünə həsr olunan tədbirdə çıxış edərkən dedi. Sonra idarə rəisinin təklifi ilə soyqırım qurbanlarının əziz xatirəsi bir dəqiqəlik sükutla yad olundu.
İdarənin rəis müavini, polis mayoru İlham Rzayev bildirdi ki, yurdumuzun bir parçası olan və milli-mədəni irsimizin təşəkkül tapdığı tarixi ərazilərdən biri kimi Xocalı iyirmi beş il öncə 366-cı motoatıcı alayın köməyilə erməni millətçiləri tərəfindən yerlə-yeksan olundu, dinc sakinlər qəddarlıqla öldürüldü, 8 ailə tamamilə məhv edildi. Düşmən təkcə xocalılıları deyil, tarixi abidələri də məhv edərək bu torpaqlardan izimizi, kökümüzü silməyə çalışdı.
Digər çıxış edən şəxslər də erməni şovinistlərinin qəddarlığından söz açaraq, böyüməkdə olan nəslə unutqanlığın nə qədər böyük bəlalara yol açdığını aşılamaqla, onların haqsızlığa, zülmə, əsarətə nifrət ruhunda böyüməsinin vacibliyini bildirdi.
Tədbirə yekun vuran polis polkovnik-leytenantı N.Həsənov bu gün ölkə başçımızın apardığı siyasət nəticəsində Xocalı soyqırımını dünyanın bir çox dövlətinin tanıdığını, bu istiqamətdə aparılan işlərin öz bəhrəsini verdiyini və düşmən təbliğatının, yalanının qarşısını almaq üçün bütün dünya azərbaycanlılarının həmrəyliyinin vacib olduğunu diqqətə çatdırdı.
Hafiz Təmirov polis mayoru
