2017-ci ilin əvvəllərində "Kooperasiya" nəşriyyatında ədəbiyyatşünas, professor Rüstəm Kamalın polis polkovniki Sadir Məmmədovun həyat yoluna həsr etdiyi "Tanı oğlunu, Vətən" adlı kitabı nəşr olunub. Qeyd edək ki, Azərbaycanın vətənpərvər və şücaətli oğullarından biri olan S.Məmmədovla bağlı kitab sənədlər, xatirələr əsasında yazılıb və Qarabağ müharibəsinin gerçəklikləri əks olunub.
Nəşrin redaktoru filologiya elmləri üzrə fəlsəfə doktoru, dossent Elşən Şükürlü, rəyçiləri isə polis general-mayoru Oqtay Əliyev, hüquq elmləri doktoru, professor Habil Qurbanov, tarix elmləri üzrə fəlsəfə doktoru, dossent Əsgər Əhməddir.
S.Məmmədov haqqında "Hər oğul-bir tarix" yazısında akademik Teymur Bünyadov yazır: "Eyni zamanda, polkovnik S.Məmmədovu yaxşı tanıyıram, görüşlərimiz, söhbətlərimiz olub, onun haqqında mənə çox danışıblar. Onun ömür yolu gerçəkdən bir kitabın mövzusudur. Düzən Qarabağdakı Kəngərli elatlarından olan Göytəpədə dünyaya göz açıb, ixtisasca tarix müəllimi, sonra Özbəkistanda polis orqanlarında uğurlu karyera, Moskvada SSRİ DİN Akademiyasını fərqlənmə diplomu ilə bitirmiş və Qarabağ fitnəsi alovlanmağa başlayanda tərəddüd etmədən hər şeyi ataraq Vətənə dönmüş, Şuşa Rayon Milis Şöbəsinin rəisi, daha sonra Muxtar Vilayət Daxili İşlər İdarəsinin rəis müavini, Ağdərə Rayon Polis Şöbəsinin ilk rəisi... O günlər üçün informasiyalı məsul şəxslərdən biri olaraq nələrin baş verdiyi, köpüklənən fitnə-fəsadın anatomiyasını yaxşı bilən, hadisələrin içərisində olan Azərbaycan vətənsevəri... Qarabağ uğrunda açıq və gizli gedən qanlı müharibədə tarix yazanlardan, o tarixi gözü ilə görənlərdən, bilənlərdən biri, düşmənin arasında, fitnə-fəsad, terror yuvasında işləmək hər oğulun işi deyildi. Hər an ölüm təhlükəsi, hədə-qorxular, təhdidlər, pusqular və bütün bunlara qarşı qorxu bilmədən dayanmaq, duruş gətirmək, təhdidlərin üstünə getmək, onu zərərsizləşdirmək əzmi... Bunlar bir kitabın mövzusu deyilmi?".
"Tanı oğlunu, Vətən" kitabında Azərbaycanın görkəmli insanlarının, alimlərin, S.Məmmədovun həyatını, fəaliyyətini yaxından izləyən insanların fikirləri yer alıb.
Hesab edirik ki, nəşr Qarabağ müharibəsi haqqında yazılan maraqlı, əhatəli, gərəkli kitablardan biridir.
İradə SARIYEVA
