Aynur Camalqızı: "Mehriban xanımın insanlara həddən-ziyadə yaxın olması, əhalinin problemlərinə yüksək həssaslıqla çarə tapması xalq tərəfindən yüksək qiymətləndirilir"
Məlahət İbrahimqızı: "Mehriban xanım Əliyevanın sosial məsələlərlə məşğul olması hər kəsin ürəyincədir"
"Mən işimi sosial məsələlərin, əhalinin aztəminatlı hissəsinin problemlərinin həlli üzərində qurmaq niyyətindəyəm". Bu sözləri Azərbaycanın Birinci vitse-prezidenti Mehriban Əliyeva Rusiyanın "Vesti nedeli" verilişinə müsahibəsində deyib. M.Əliyeva daha sonra qeyd edib: "Mərhəmətsizlik və laqeydlik qorxulu anlayışlardır. İstər ictimai xadim, istərsə də dövlət məmuru üçün humanizmi qorumaq vacibdir".
Azərbaycanın Birinci vitse-prezidenti M.Əliyevanın fikirlərinə münasibət bildirən millət vəkili Məlahət İbrahimqızı "Bakı-Xəbər"ə açıqlamasında qeyd etdi ki,
ölkə ictimaiyyəti M.Əliyevanın Azərbaycanın Birinci vitse-prezidenti təyin olunmasını müsbət qarşılayır: "Elə bir sahə yoxdur ki, o orada öz töhfəsini verməsin. Mədəniyyət, incəsənət, təhsil, səhiyyə, idman, sosial və digər sahələrdə uğurlu işlər görüb".
Xanım millət vəkili qeyd etdi ki, 2003-cü ildən bu günə kimi M.Əliyevanın gördüyü işlərin təməlində mərhəmət, humanizm və həssaslığın olduğunu görmək olar: "Bu günlərdə Mehriban xanım Rusiyanın "Vesti nedeli" verilişinə müsahibəsində Birinci vitse-prezident kimi görəcəyi işlərin sırasında sosial məsələlərin də olacağını qeyd edib. O, mərhəmətsizlik və laqeydliyin qorxulu anlayışlar olduğunu vurğulayıb. Bu gün istənilən sahədə çalışan şəxslərin xidmətində humanizm yoxdursa, orada problemlərin çox olacağını Birinci vitse-prezident müsahibəsində dilə gətirib".
M.İbrahimqızının fikrincə, cəmiyyətin sosial problemlərin həllində humanizmə ehtiyacı var: "Mehriban xanımın əvvəlki işlərinin davamı olaraq Birinci vitse-prezident kimi də gördüyü işlərdə bu mərhəməti görəcəyik. Mehriban xanım Əliyevanın sosial məsələlərlə məşğul olması hər kəsin ürəyincədir".
"Teleqraf" Holdingin rəhbəri Aynur Camalqızı "Bakı-Xəbər"ə açıqlamasında qeyd etdi ki, Mehriban xanım ictimai-siyasi fəaliyyəti boyunca aztəminatlı əhalinin yanında olub. İstər millət vəkili, istərsə də Heydər Əliyev Fondunun rəhbəri kimi daim xalqın qayğıları ilə maraqlanıb, onların problemlərinin həllində iştirak edib: "Təsadüfi deyil ki, hər bir vətəndaş məmurlardan daha çox Heydər Əliyev Fonduna etibar edib. Bu səbəbdən də ölkə daxilində insanların öz şəxsi problemləri, sosial məsələlərlə bağlı daha çox üz tutduğu ünvan Heydər Əliyev Fondudur. Bu da təbii ki, Mehriban xanımın şəxsiyyəti ilə bağlıdır. Onun insanlara həddən-ziyadə yaxın olması, əhalinin problemlərinə yüksək həssaslıqla çarə tapması xalq tərəfindən yüksək qiymətləndirilir. Ona görə də Azərbaycanın Birinci vitse-prezidenti xalq tərəfindən sevilir".
A.Camalqızı hesab edir ki, M.Əliyevanın Birinci vitse-prezident təyin olunması ilə onun qarşısında geniş imkanlar açılır: "Öz müsahibəsində qeyd etdiyi kimi, o, sosial problemlərin həllində daha yaxından iştirak edərək xalqın yanında olacaq. Bəllidir ki, Mehriban xanım vətənpərvər bir insandır. Bunu onun bütün fəaliyyət müddəti ərzində müşahidə etmişik. Düşünürəm ki, o öz vətənpərvərliyini işində daha bariz şəkildə göstərəcək".
Günel CƏLİLOVA
