"Nəzərə almaq lazımdır ki, jurnalistlər cəmiyyəti informasiya ilə təmin edən qurumlardır"
Son günlər cəbhə bölgəsində atəşkəsin pozulması medianın əsas gündəmində olan mövzulardan biridir. KİV-lər bu məsələyə böyük diqqət ayırır. Bu təbiidir. Çünki müharibə yalnız səngərdə getmir. İnformasiya sahəsində də tərəflər arasında psixoloji mübarizənin aparılması müharibənin yazılmamış qanunları sırasına aiddir.
Ancaq, təəssüflər olsun, bəzi internet saytlarının yoxlanmamış məlumat verməsi cəmiyyətdə birmənalı qarşılanmadı. Belə vəziyyətdə Mətbuat Şurası cəbhədə vəziyyətin gərginləşməsi ilə bağlı KİV-ə çağırış etməli oldu. MŞ sədri Əflatun Amaşovun yayılan açıqlamasında hadisə və proseslərə münasibətdə həssas olmağın vacibliyi vurğulanıb: "Hərçənd müşahidələrimiz onu deməyə əsas verir ki, tələskənliyə yol verən, hansısa formada populyarlıq qazanmağı hədəf seçərək media orqanları kimi fəaliyyət göstərdiyini iddia edən kimlərsə var. Belələri, heç bir halda, kütləvi informasiya vasitəsi olaraq qəbul edilməyəcək".
Ə.Amaşov bildirib ki, pozitiv və neqativ məzmunundan asılı olmayaraq, düşmən qüvvələr istər özlərinin, yaxud özlərinə yaxın dairələrin internet informasiya ehtiyatlarında, istərsə də sosial şəbəkələrdə Azərbaycanın milli maraqlarına uyğun olmayan, beynəlxalq imicinə ləkə gətirən xəbərləri dövriyyəyə buraxırlar: "Belə durumlarda media təmsilçilərimizin daha diqqətli olması şərtdir".
Eyni zamanda, MŞ sədri medianı Müdafiə Nazirliyinin açıqlamalarını gözləməyə çağırıb.
Maraqlıdır, media ekspertlərinin buna münasibəti necədir? Məsələyə münasibət bildirən media eksperti Yadigar Məmmədlinin sözlərinə görə, sözügedən məsələdə tələskənliyə yol vermək olmaz: "Çünki cəbhə bölgəsində hər bir kəsin yaxını, qohumu öz əsgəri borcunu yerinə yetirir və vətəni qoruyur. Ona görə də təmas xəttində baş verən hər hansı bir hadisə hər birimizi narahat edir. Belə situasiyalarda informasiyanın dəqiq və vaxtında verilməsi çox vacibdir. Son günlər yaşananlara gəldikdə isə, bu daha çox informasiyanın bir qədər gec verilməsi ilə bağlı oldu. İnformasiya verilməyəndə, çox məhdud veriləndə bu, müəyyən panik vəziyyət yaradır. İnformasiya qıtlığı müəyyən şayiələrin yaranmasına şərait yaradır. Hesab edirəm ki, nə qədər acı olsa da, baş verən hadisə ilə bağlı informasiyanı vaxtında vermək daha məqsədəuyğundur. Bunu vermək verməməkdən daha məqbuldur. Çünki informasiyanın verilməməsi fəsadlar doğurur. Nəzərə almaq lazımdır ki, jurnalistlər cəmiyyəti informasiya ilə təmin edən qurumlardır. Jurnalistlər anlamalıdır ki, dövlət, təhlükəsizlik məsələləri ilə bağlı tələskənliyə yol vermək olmaz. Ancaq tələskənliyin də bir həddi var. Qarşı tərəf informasiyanı verirsə, bunu özününküləşdirirsə, o zaman buna qarşı adekvat tədbirlərin görülməsi zərurəti ortaya çıxır".
Vidadi ORDAHALLI
