Məhərrəm Zülfüqarlı: "Bu, Azərbaycanın Xocalı soyqırımı ilə bağlı apardığı genişmiqyaslı işin növbəti mərhələsidir"
Soyqırım bəşər tarixinin ən ciddi yaşam problemlərindəndir. Soyqırım bir etnik toplumun dil, din, mədəniyyət və s. məlum səbəblərə görə şüurlu şəkildə məhvinə yönəlmiş aktdır. Bir qrupun varlığının tamamilə silinməsi məqsədilə hər cür şiddət və vəhşəti ehtiva edən termindir.
Tarix boyu əzəli Azərbaycan torpaqlarına yiyələnməyə çalışan, öz mənfur və saxta niyyətlərini həyata keçirmək ümidilə yaşayan ermənilər zaman-zaman bu istəklərini reallaşdırmaq üçün fürsət qazanıb.
XX əsrin sonlarında SSRİ-nin çökməsi, yeni münaqişə ocaqlarının yaranması "Böyük Ermənistan" xülyası ilə yaşayan ermənilərin aktivləşməsinə şərait yaratdı. "Türksüz Ermənistan" şüarı altında mübarizəyə qalxan erməni millətçiləri azərbaycanlıları öz dədə-baba yurdlarından zorla qovur, etnik təmizləmə siyasəti həyata keçirirdilər. Dağlıq Qarabağda öz işğalçılıq siyasətini həyata keçirən ermənilər 1992-ci ilin 25-26 fevralında Xocalıda böyük soyqırım törətdilər.
XX əsrdə bəşər tarixinə Xocalı soyqırımı kimi daxil olan qanlı faciənin 25-ci ildönümü ilə əlaqədar fevralın 26-da Bakıda ümumxalq yürüşü keçirilib. Yürüşdə Prezident İlham Əliyev və digər dövlət rəsmiləri iştirak edib. Paytaxtın Azadlıq meydanından başlayan və 40 mindən çox insanın iştirak etdiyi ümumxalq yürüşünün məqsədi Xocalı soyqırımı qurbanlarının xatirəsini ehtiramla yad etmək, erməni faşistləri tərəfindən insanlığa qarşı törədilmiş bu vəhşi cinayəti yenidən dünya ictimaiyyətinin diqqətinə çatdırmaq olub.
Bununla yanaşı, soyqırımla bağlı dünyanın bir sıra ölkələrində silsilə tədbirlər keçirildi. Bütövlükdə, bu il sözügedən məsələ ilə bağlı hansı yeniliklər özünü göstərdi? Tarix elmləri üzrə fəlsəfə doktoru Məhərrəm Zülfüqarlının fikrincə, ilbəil dünyada Xocalı ilə bağlı keçirilən tədbirlər çoxalır: "Müxtəlif ölkələrdə bununla bağlı tədbirlər keçirilir. Mütləq deyil ki, bu tədbirlər Qərb ölkələrində olsun. Bütün dünyada bunu təbliğ etmək lazımdır və bu yöndə iş aparılır. Bu, Azərbaycanın Xocalı soyqırımı ilə bağlı apardığı genişmiqyaslı işin növbəti mərhələsidir. Dünya Xocalı qırğını haqqında əsl həqiqəti bilməli, başa düşməlidir ki, XX əsrin sonunda bütün sivil bəşəriyyətin gözü qarşısında törədilmiş bu vəhşiliyin səbəbkarları cəzalandırılmalıdır. Çünki bunun baiskarlarının cəzalandırılmaması belə faciələrin planetin hər bir nöqtəsində təkrarlanmasına gətirib çıxara bilər. Fikrimcə, Xocalıda baş verənlər dünya ictimaiyyətinə ilbəil daha mükəmməl formada çatdırılır". Vidadi ORDAHALLI
