Xocalı soyqırımının 25-ci ildönümü ilə bağlı respublikamızın müxtəlif qurumlarında anım tədbirləri keçirilir. Fevralın 24-də Azərbaycan Respublikası "Xatirə Kitabı" redaksiyasında XX əsrin dəhşətli faciələrindən olan Xocalı soyqırımının 25 illiyinə həsr olunmuş tədbir keçirildi. Əvvəlcə Azərbaycanın müstəqilliyi uğrunda şəhid olan insanların, Xocalı soyqırımı qurbanlarının xatirəsi bir dəqiqəlik sükutla anıldı.
Qeyd edək ki, tədbirdə şəhid gizir Aydın Abdullayevin atası Əmirsoltan Abdullayev qonaq qismində iştirak edirdi. Anım tədbirini açan "Xatirə Kitabı" redaksiyasının baş redaktoru Nəzakət Məmmədova Xocalı soyqırımı qurbanları haqqında danışdı. N.Məmmədova qeyd etdi ki, ermənilər tərəfindən törədilən Xocalı qətliamı tariximizdə qanlı səhifələr açıb. Genosidin törədilməsindən 25 il keçməsinə baxmayaraq, hələ də cinayətkarlar öz cəzasını almayıb. Nahaq qanın yerdə qalmayacağı qənaətini bölüşən baş redaktorun sözlərinə görə, nə qədər ki, Xocalı soyqırımının şahidləri var, bu hadisəni gözü ilə görən, o faciəni yaşayan, ailəsini, yaxınlarını itirən insanların acı xatirələri qələmə alınmalı, ekranlara gətirilməli, kitablara, filmlərə çevrilməli və bütün dünyaya yayılmalıdır.
Xocalı soyqırımı zamanı 613 nəfərin şəhid edilməsi faktına münasibət bildirən baş redaktorun vurğuladığına görə, şahidlərin danışdıqlarından məlum olur ki, öldürülənlərin sayı həddən artıq çox olub.
Şəhid gizir Aydın Abdullayevin atası Əmirsoltan Abdullayev çıxışında Xocalı soyqırımı qurbanlarının qanının yerdə qalmayacağına əmin olduğunu bildirdi. Oğlunu Vətən uğrunda şəhid verən ata Aydının qəhrəmanlığı ilə öyündüyünü bildirdi. Şəhid atası qeyd etdi ki, Xocalıda baş verənləri xalq olaraq unutmalı deyilik, bu soyqırım haqqında çox danışılmalı, çox yazılmalıdır.
Anım mərasimində "Xatirə Kitabı" redaksiyasının əməkdaşları Nahid Salayev, Vüqar Əsgərov, Zöhrə Fərəcova, İsrafil müəllim və başqaları çıxış edərək Xocalı hadisəsinin tariximizin qanlı səhifələrindən olduğunu bildirdilər. Onlar qeyd etdilər ki, xalqımızın yaşadığı bu faciəni törədənlər beynəlxalq hüquq qarşısında cavab verəcək.
İradə SARIYEVA
