"Lapşinin məsələsi göstərdi ki, buna nail olmaq mümkündür"
Avropa Parlamentinin üzvləri barəsində Azərbaycanın işğal altında olan ərazilərinə qanunsuz səfər etdiklərinə və Dağlıq Qarabağı "müstəqil respublika" kimi elan etmələrinə görə cinayət işi başlanıb.
Baş Prokurorluqdan verilən məlumata görə, Ermənistan Azərbaycan Respublikasının işğal olunmuş ərazilərinə əcnəbi vətəndaşların qanunsuz səfərlərini təşkil edərək qondarma rejimi təşviq etməyə cəhd göstərir, işğal olunmuş ərazilərin maddi-mədəni irsini və təbii sərvətlərini talan edir, iqtisadi və digər qanunsuz fəaliyyətləri həyata keçirir.
Avropa Parlamentinin üzvləri - Lüksemburq Böyük Hersoqluğunun vətəndaşı Frank Engel, Kipr Respublikasının vətəndaşı Eleni Teoxarus və Çex Respublikasının vətəndaşı Yaromir Ştetina "Dağlıq Qarabağ Respublikası" adı altında yaradılmış qondarma rejimin beynəlxalq səviyyədə təbliğ edilməsi məqsədilə kütləvi informasiya vasitələrinə verdikləri müsahibələrində, iştirak etdikləri beynəlxalq tədbir və konfranslarda işğal edilmiş ərazilərdə qanunsuz fəaliyyət göstərən qurumu "müstəqil dövlət" kimi təqdim etmələrinə, Azərbaycan Respublikasının mühafizə olunan dövlət sərhədinin nəzarət-buraxılış məntəqələrindən kənarda dəfələrlə, xüsusən son dəfə 2017-ci il fevralın 20-də Azərbaycanın işğal olunmuş ərazilərində keçirilmiş qondarma "referendum"da "müşahidəçi" qismində iştirak etmək üçün keçmələrinə əsaslı şübhələr olduğundan, Azərbaycan Respublikası Cinayət Məcəlləsinin müvafiq maddələri ilə təqsirləndirilən şəxslər qismində cəlb olunmaqla, məhkəmənin qərarı əsasında həbs-qətimkan tədbiri seçilərək, barələrində beynəlxalq axtarış elan olunması üçün "İnterpol"a müvafiq sorğu göndərilib.
Azərbaycan Respublikası öz suverenliyi və ərazi bütövlüyünün pozulması hallarına yol verilməməsi, eləcə də vətəndaşlarının hüquq və qanuni maraqlarını qorumaq məqsədilə bu kimi qanunazidd fəaliyyətə cəlb edilmiş əcnəbi şəxslərə qarşı münasibətdə zəruri və qəti addımlarını bundan sonra da atacaq.
Avropa Parlamentinin deputatlarının "İnterpol" xəttilə məsuliyyətə cəlb edilərək, Azərbaycana ekstradisiya olunması nə dərəcədə mümkündür?
Hüquqşünas Tağı Qəmbərov qəzetimizə bildirdi ki, bunun üçün kifayət qədər əsaslar var: "Təbii ki, söhbət hüquqi əsaslardan gedir. Bilirsiniz ki, həmin deputatların etdiyi əməllərdə cinayət tərkibi yaradan kifayət qədər dəlillər var. Ölkəmizin sərhədini qanunsuz keçiblər. Tanınmamış qondarma bir qurumun təşkil etdiyi "referendum"a dəstək verirlər, onu bütün dünyaya təbliğ edirlər. Prokurorluğun əsaslandığı dəlillər həmin adamların saxlanaraq Azərbaycana təhvil verilməsi üçün tam əsas yaradır. Burada qalır bir deputat toxunulmazlığı. Bunun da aradan qaldırılması üçün kifayət qədər əsaslar mövcuddur. Deputat toxunulmazlığı immuniteti heç kimə cinayət törətmək üçün əsas vermir. Həmin deputatlar Azərbaycanın qanunlarını pozaraq kifayət qədər ağır cinayətlər törədib. Bu da onların Azərbaycana ekstradisiyası üçün əsas vermiş olur. Bunun üçün "İnterpol" xəttilə həmin deputatların təmsil olunduqları ölkə parlamentlərinə sorğular verilməlidir. Bundan sonra onların mandatının ləğvi məsələsi qoyula bilər. Avropanın müxtəlif ölkələrini təmsil etdikləri üçün, onların hər biri ilə bağlı fərdi yanaşma ortaya qoyulmalıdır. Lapşinin məsələsi göstərdi ki, buna nail olmaq mümkündür".
Məhəmmədəli QƏRİBLİ
