Ramil Hüseynov: "Belə bir mürəkkəb vəziyyətdə daha ayıq-sayıq olmalıyıq"
Müdafiə naziri Zakir Həsənovun cəbhəboyu zonaya səfəri davam edir. Nazirin səfəri zamanı əsas diqqət Ermənistan silahlı qüvvələrinin cəbhənin bütün istiqamətlərində təxribat törətmək cəhdlərinin qarşısının qoşunlarımız tərəfindən qətiyyətlə alınması üzrə tədbirlərin görülməsinə yönəldilib.
Bu barədə Müdafiə Nazirliyi məlumat yayıb. Gecə saatlarında ön xətdəki bölmələrimizi yoxlayarkən, Müdafiə Nazirliyinin rəhbərliyi düşmənin kəşfiyyat-diversiya qrupunun Talış və Gülüstan istiqamətlərində təxribat törətmək cəhdlərini müşahidə vasitələri ilə izləyib. Yerində verilən tapşırıqlar və dərhal görülən tədbirlər nəticəsində düşmən geri çəkilməyə məcbur edilib.
Məlumata görə, işğaldan azad edilmiş ərazilərdə döyüş növbəsi çəkən şəxsi heyətlə görüşən müdafiə naziri, general-polkovnik Zakir Həsənov şəxsi heyətin döyüşə hazırlıq səviyyəsini və mənəvi-psixoloji vəziyyətini yoxlayıb, həmçinin, hərbi qulluqçuların sosial-məişət şəraiti ilə tanış olub. Ön xətdə xidmətdə fərqlənən bir qrup hərbi qulluqçuya qiymətli hədiyyələr təqdim etdikdən sonra nazirliyin rəhbər heyəti süfrə arxasında əsgərlərlə söhbət edib. Eyni zamanda, cəbhə xəttində yeni inşa edilmiş təlim mərkəzinin, qərargah binasının və əsgər yataqxanalarının açılışı olub. Təlim mərkəzi haqqında məruzə edilərək bildirilib ki, burada idarəetmə məntəqəsi, qərargah binası və şəxsi heyətin yerləşdirilməsi üçün lazımi infrastruktur yaradılıb.
Qeyd edək, Zakir Həsənov nazir təyin olunandan sonra tez-tez cəbhə bölgəsinə səfər edir.
Sözügedən məsələni dəyərləndirən VİP funksioneri Ramil Hüseynovun fikrincə, nazirin tez-tez cəbhə bölgəsinə səfər etməsi müsbət haldır: "Bu, ordunun döyüş ruhunu artırır, əsgərlərin mənəvi-psixoloji vəziyyətinə müsbət təsir göstərir. Eyni zamanda, mümkün erməni təxribatlarına qarşı daha adekvat tədbirlərin görülməsi baxımından bunun mühüm əhəmiyyəti var. Əsgərlər görəndə ki, nazir kabinetdə yox, tez-tez səngərdədir, bu, istər-istəməz, onlarda ruh yüksəkliyini artırır. Belə ki, əvvəlki nazirin dövründə biz bunun əksini görürdük. Digər tərəfdən, Ermənistanda seçkilər yaxınlaşdıqca, Sarkisyan rejimi ictimaiyyətin diqqətini daxili məsələlərdən yayındırmaq üçün məqsədyönlü şəkildə cəbhədə təxribatlara rəvac verir. Belə bir mürəkkəb vəziyyətdə daha ayıq-sayıq olmalıyıq. O baxımdan səfəri müsbət qiymətləndirirəm". Vidadi ORDAHALLI
