Akif Aşırlı: "İstənilən vəzifəli və yaxud da vəzifədən xaric olunan şəxs jurnalistlərə qarşı hər hansı bir qeyri-etik hərəkətə yol verməməlidir"
2015-ci ilin oktyabrında MTN ətrafındakı məlum hadisələrdən sonra cinayət məsuliyyətinə cəlb olunan dörd generaldan biri nazirliyin Əməliyyat-Texniki İdarəsinin rəisi olmuş Natəvan Mürvətovadır. N.Mürvətovanı çıxmaqla, MTN işi üzrə saxlananların hamısına həbs-qətimkan tədbiri seçilib. Xanım generaldan başqa yerə getməmək barədə iltizam alınıb. O bu səbəbdən məhkəməyə evindən gedib-gəlir.
N.Mürvətovanın ötən həftə "rədd olun" deyərək jurnalistləri təhqir etməsi böyük söz-söhbətə səbəb oldu. Belə ki, fevralın 14-də keçirilən məhkəmə prosesindən sonra ev dustaqlığında olan N.Mürvətova jurnalistlərin kameralarından yayınmaq üçün məhkəmə binasını ən sonda tərk edib. Ancaq buna baxmayaraq, jurnalistlər MTN-in ilk qadın generalının fotolarını lentə ala bilib. Xanım generalın jurnalistlərin "ittihama münasibətiniz necədir" sualına cavabı kobud olub. Vəkili və bir nəfər şəxslə avtomobilə əyləşən N.Mürvətova jurnalistlərə "rədd olun" deyərək şəklinin çəkilməməsinə çalışıb.
Fevralın 21-də keçirilən növbəti məhkəmə prosesindən sonra da xanım general jurnalistlərə açıqlama verməkdən imtina edib. Lakin o, bu imtinasını, ötən dəfəkindən fərqli olaraq, bir qədər mədəni tərzdə edib. Belə ki, o bildirib ki, ittiham barəsində danışmaq istəmir: "Bu haqda danışmaq istəmirəm".
Bir sıra cinayətlərdə ittiham olunan xanım generalın ittihamlara cavab vermək əvəzinə media təmsilçilərini təhqir etməsi heç cür başadüşülən deyil. O baxımdan media rəhbərlərinin buna münasibəti necədir?
Məsələyə münasibət bildirən "Şərq" qəzetinin baş redaktoru Akif Aşırlının sözlərinə görə, jurnalistlərə qarşı bu cür davranışlar yolverilməzdir: "Əvvəla o, son açıqlamasında bununla bağlı hardasa üzürxahlıq edib. Ancaq, istənilən halda, jurnalistlərə qarşı hər hansı kobud hərəkət yolverilməzdir. Jurnalist öz vəzifəsin icra edir. Jurnalist ictimai, siyasi xadimlərə, marağı olan insanlara istənilən sualı verə bilər. Çünki bu onun peşə borcundan irəli gələn bir haldır. O baxımdan hesab edirəm və düşünürəm ki, heç kəs jurnalisti aşağılamamalıdır. Hesab etməsinlər ki, bu gün cəmiyyətdə hansısa jurnalist adından sui-istifadə edib müəyyən məqsədlərə xidmət edən, ayrı-ayrı qrupların maraqlarına xidmət edənlər üzündən peşəkar jurnalist yoxdur. Elələrindən fərqli olaraq, Azərbaycanda peşəkar jurnalistlər var. Peşəkar jurnalistlər öz peşə fəaliyyəti ilə, cəmiyyəti maarifləndirməklə məşğul olur. Həmçinin, cəmiyyətin informasiya yükünü çəkir. Eyni zamanda, dövlətin təhlükəsizlik məsələləri ilə çox ciddi şəkildə məşğul olur. Ona görə də hesab edirəm ki, istənilən vəzifəli və yaxud da vəzifədən xaric olunan şəxs jurnalistlərə qarşı hər hansı bir qeyri-etik hərəkətə yol verməməlidir".
Vidadi ORDAHALLI
