Qulu İsmayılov: "Münhendəki təqdimat isə onun layiq olduğu keyfiyyətlərə verilən obyektiv qiymətdir"
Xəbər verdiyimiz kimi, Prezident İlham Əliyev Münhen Təhlükəsizlik Konfransı çərçivəsində "Qiymətlərin sabitləşməsinə doğru: OPEC-in qayıdışı və neft geosiyasəti" mövzusunda "dəyirmi masa"da iştirak edərkən Münhen Təhlükəsizlik Konfransının sədri Volfqanq İşinger Təhlükəsizlik Konfransını uzun müddətdir dəstəkləyən və onun dostu olan Prezident İlham Əliyevi salamlayaraq deyib:
"Cənab Prezident, Siz bu konfransda dəfələrlə çıxış etmisiniz. Sizin ekspert biliyiniz təkcə enerji sahəsində vacib rol oynayan ölkənin rəhbəri kimi yox, ölkəyə on dörd il başçılıq edən bir şəxs kimi də bizim üçün vacibdir. Ölkəniz Avrasiya təhlükəsizliyinin və siyasətinin sərhədləri üzərində yerləşir. Ölkənizə səfər etdikdə mənə dəfələrlə vaxt ayırdığınıza görə Sizə necə minnətdar olduğumu burada toplaşan insanlara çatdıra bilmirəm".
İlham Əliyevin bu cür təqdimatı onun beynəlxalq çəkisinin əyani göstəricisi kimi sayıla bilərmi?
Ekspert Qulu İsmayılov qəzetimizə bildirdi ki, İlham Əliyev siyasi diskussiyalarla yanaşı, iqtisadi müzakirələrdə də yaxından iştirak edir: "Təbii ki, dediyiniz təqdimat təsadüfən ortaya çıxmayıb. Bəli, İlham Əliyev dünyanı əhatə edən qlobal iqtisadi problemlərlə bağlı daim dəyərli fikirlərini bildirir. Davos Forumunda mütəmadi iştirak edir. Həmin forumun saytında iqtisadi aspekti əhatə edən təhlil məqalələri təqdim olunur. Görürsünüz ki, mötəbər şəxslər belə İlham Əliyevin fikirlərini vacib məsləhət kimi qəbul edir, ona dəyər verirlər. Sözsüz ki, burada 14 illik prezidentlik təcrübəsinin də rolu az deyil. İlham Əliyevin verdiyi bir çox proqnozlar tez bir zamanda özünü doğruldub. Buna aid bir neçə missal çəkə bilərik. Neftin qiymətilə bağlı cənab Prezidentin verdiyi proqnoz, demək olar ki, dəqiqliyilə təsdiqini tapdı. Bununla bir daha sübut olunur ki, İlham Əliyev bir siyasi lider kimi hərtərəfli biliyə malikdir. Münhendəki təqdimat isə onun layiq olduğu keyfiyyətlərə verilən obyektiv qiymətdir".
Məhəmmədəli QƏRİBLİ
