Braziliyada keçiriləcək XXXI Yay Olimpiya Oyunlarında iştirak edəcək idmançıların təxminən yarısı medal qazana bilər. Olimpiya Oyunlarından azı 10-12 medal gözləyirik. Trend-in məlumatına görə, bunu bu gün keçirdiyi mətbuat konfransında Milli Olimpiya Komitəsinin vitse-prezidenti Çingiz Hüseynzadə bildirib.
Onun sözlərinə görə, medalla bağlı proqnoz vermək çətindir. Proqnozu yalnız idmançılarımızın potensialını nəzərə almaqla vermək olar: "Bu oyunlarda komanda üzvlərinin, idman növlərinin sayı daha çoxdur. Oyunlarda 56 nəfər iştirak edəcək. Komandanın demək olar ki, yarısı medallara namizəd olur. Bu dəfə də idmançıların təxminən yarısı medal qazana bilər. Hesab edirik ki, medalların sayı və keyfiyyəti London Olimpiadasından daha çox və üstün olacaq".
Ç.Hüseynzadə deyib ki, olimpiya yığma komandasının əsas heyəti 3 gün sonra Braziliyaya yola düşür. XXXI Yay Olimpiya Oyunlarının yayım hüququ İTV-yə məxsusdur. Ona görə də oyunlar canlı olaraq, İTV-də yayımlanacaq. İTV hər gün 8 yayım verəcək: "Biz yenilik etdik və qərara gəldik ki, vaxt fərqinə baxmadan, oyunların ən isti xəbərlərini internet üzərindən çatdıraq. Ona görə də MOK-un bütün internet resursları tam gücü ilə işləyir. Vaxt fərqi olmadan xəbərlər çatdırılacaq".
Ç.Hüseynzadə bildirib ki, Olimpiya Oyunlarında iştirak edəcək idmançıların birinci qrupu artıq yola düşüb. İkinci qrup avqustun 1-dən 2-ə keçən gecə yola düşəcək. Onun sözlərinə görə, idmançılar oyunlara təntənəli şəkildə yola salınacaq: "Din xadimlərimiz idmançılara xeyir-dua verəcəklər. Musiqi və rəqslər də olacaq. İdmançıların gediş-gəliş vaxtını idman federasiyalarının xahişini nəzərə alaraq müəyyən etmişik. Kim tez qayıtmaq istəyirsə, tez qayıdacaq. Məsələn, cüdoçular yarışlarını tez bitirirlər və onlar tez qayıtmaq istəyirlər. Amma olimpiya kəndində qalma kvotası da var. Onların 50 faizi yerini dəyişməlidir. Bu da təşkilatçıların imkanları ilə bağlıdır. Azərbaycanda keçirilən Avropa Oyunlarında idmançıların sonadək qalma imkanı var idi".
Ç.Hüseynzadə bildirib ki, Braziliyada keçiriləcək XXXI Yay Olimpiya Oyunlarında iştirak edəcək idmançıların zika virusundan qorunması üçün bəzi tövsiyələr də verib. Onun sözlərinə görə, 6 ay əvvəllə müqayisədə indi Braziliyada zika virusu ilə bağlı təhlükə zəifləyib. Çünki hazırda Braziliyada qışdır: "Qışda ağcaqanadlar az olur. İkincisi, kənddə bununla bağlı bir qorxu olmayacaq. Üçüncüsü, oraya gedənlərə tövsiyə edilib ki, uzunqol köynək geyinsinlər, qısa şalvar geyinməsinlər. Həm qadınlar, həm də kişilər şalvar, ayaqlarına corab geyinməlidirlər. Ağcaqanadların zəhərini çəkmək üçün idmançılarda xüsusi cihazlar da olacaq. Dünyada bu virusa vaksin tapılmayıb. Amma bir balaca ağcaqanada görə olimpiya oyunlarını təxirə salmaq olmaz ki".
