Məlum olduğu kimi, bu günlərdə Mətbuat Şurası reket və ya yalan yazan media orqanları ilə bağlı geniş müzakirə apardı və bunun ardınca Baş Prokurorluq bir neçə "məşhur” sayt rəhbərlərini xüsusi söhbətə dəvət edərək, onlara xəbərdarlıq etdi. Artıq bu saytların adları cəmiyyətə məlumdur və Mətbuat Şurasının xəttilə müəyyən KİV xüsusi monitorinq altına alınıb. Görünən budur ki, belə KİV-lə bağlı olaraq artıq hüquq-mühafizə orqanları hərəkətə keçib və bu çox əsaslı görünür. Proses hara yönüm alıb və mediamızı "yalan və şantaj peşəkarları”ndan xilas etmək mümkün olacaqmı?
"Bakı-Xəbər” qəzetinin baş redaktoru, Mətbuat Şurası İdarə heyətinin və Şikayətlər Komissiyasının üzvü Aydın Quliyev bildirdi ki, hazırda hüquq-mühafizə orqanlarının bəzi media təmsilçilərinə qarşı atdığı xəbərdarlıq addımları əslində çoxdan başlanmış prosesin davamıdır və xeyli əsaslıdır:”İllərdir ki, Mətbuat Şurasının İdarə Heyəti yalan və şantajı iş üslubuna çevirmiş qəzet və saytlarla mübarizə aparır. Ortada müsbət nəticələr var. Onların əl-ayağı xeyli yığışdırılıb, 80-dən çox qəzet və sayt "reketlər” siyahısına salınıb, bu siyahı mötəbər dövlət və özəl qurumlara göndərilib ki, onlarla əməkdaşlıq etməsinlər. Elə media qurumları var ki, adları bu siyahıya salınıb sonradan müəyyən islahat vədləri qarşılığında siyahıdan çıxarılsa da, çox keçmədən onlar köhnə əməllərindən əl çəkmədiklərini ortaya qoyublar. Təəssüf ki, MŞ-nın bundan artıq təsir göstərmək səlahiyyəti yoxdur. Həmin media qurumları isə cəzasızlıq mühitindən yararlanaraq daha da ruhlanırlar. Yaxşı haldır ki, Prezidentin köməkçisi Əli Həsənov bu vəziyyətə vaxtında müdaxilə edərək ən sərt tədbirlərin görülməsinə əsaslı meydan açdı. Sonra Mətbuat Şurası jurnalistlərin öz iştirakı ilə geniş müzakirə apardı və bunun ardınca Baş Prokurorluq rəsmi xəbərdarlıqlara başladı. Göründüyü kimi, proses ardıcıl və məcburi mərhələlərdən ibarət olmaqla davamlı bir kurs götürüb. Belə ki, illərdən bəri Mətbuat Şurasının apardığı izahat, tövsiyə və metodiki işlər reket qurumları ziyanlı yoldan tam döndərə bilmədiyi üçün məsələyə rəsmi qurumlar müdaxilə etmək məcburiyyətində qaldı. Aydın məsələdir ki, rəsmi dövlət orqanlarının sərt addımlar atması mühitini yalan və şantaj yolu tutmuş məlum KİV-in özləri yetişdirdi. Mətbuat Şurasının və rəsmi dövlət qurumlarının sərt addımları, yəqin ki, davamlı olacaq. Çünki bütün KİV-lərin dövlətçilik mövqeyində bərqərar olması üçün bu çox vacibdir”.
Aydın Quliyev hələlik yalnız internet media orqanlarına xəbərdarlıq edilməsinə də toxunaraq əlavə etdi ki, bu kifayət deyil: ”Tək internet media qurumlarına deyil, bir sıra aşkar reket qəzetlərə də xəbərdarlıq edilməlidir. Çünki yalan, şantaj üsulunu Azərbaycan mediasına məhz bu qəzetlər gətirib, bu gün yalanlarla cəmiyyəti çaşdıran saytlar məhz həmin qəzetlərin pis mənada yetişdirmələridir. Hətta bəzi şantajçı sayt rəhbərləri vaxtilə çap mediasında işləyən şəxslər olublar. Sonradan onlar daha maneəsiz fəaliyyət meydanı olan internet media sahəsinə keçdilər. İndi necə ola bilər ki, "yetişdirmələr” cəzalandırılsın, ancaq onları yetirənlər cəzasız qalsın?!”
İradə Sarıyeva
