Bu gün Qafqaz Müsəlmanları İdarəsində (QMİ) QMİ-nin dəvəti ilə Azərbaycanda səfərdə olan İran İslam Respublikasının tanınmış din xadimi, mərceyi-təqlid alimi, Ayətullahül-üzma Şeyx Hüseyn Nuri Həmədaninin iştirakı ilə konfrans keçirilib.
Trend xəbər verir ki, Qafqaz Müsəlmanları İdarəsinin sədri Şeyxülislam Allahşükür Paşazadə bildirib ki, bir müctəhidin Azərbaycana gəlişi bizim tariximizdə bizə nəsib olmayan bir nemətdir: "Hələ Azərbaycan torpağına ayətullahül-üzma, müctəhid gəlməyib. Sovet dövründə biz onları oğrun-oğrun öyrənərdik. Amma bir müctəhidin bizim dövrümüzdə gəlməsi, bizləri ziyarət etməsi olmamışdı. Bu gün bizə böyük nemət qismət olub. Müstəqillikdən sonra ilk dəfədir ki, Azərbaycana müctəhid, ayətullahül-üzma gəlib. 92 yaşı olmasına baxmayaraq, böyük əziyyət çəkərək Azərbaycana gəlib. Bu səfər Azərbaycan tarixində qalacaq. Bu bir yol oldu, cığır oldu. Onu Şeyx Həmədani açdı. Arzu edirəm ki, bundan sonra digər müctəhidlər də Azərbaycana gələcəklər".
Şeyxülislam Azərbaycan və İran arasında münasibətlərin daha da inkişaf etməsini istədiyini deyib.
Şeyx Həmədani haqqında qısa məlumat verən QMİ sədrinin sözlərinə görə, o, İranda Xomeynidən sonra şahın hakimiyyətdən getməsində xidməti olan şəxslərdən biridir. Şeyx Həmədani vətənindən dəfələrlə uzaqlaşdırılıb, amma əqidəsindən əl çəkməyib: "O, birinci müctəhiddir ki, Azərbaycanda Qarabağ şəhidlərinin ruhuna, Qarabağ torpaqlarının azad olunması üçün dualar edib".
Konfransda çıxış edən İranın Azərbaycandakı Mədəniyyət Mərkəzinin sədri Seyid Əli Ocaqnecadın fikrincə, bu gün Azərbaycan xalqının yaddaşından heç zaman çıxmayacaq: "Ona görə ki, bu gün möhtərəm, hörmətli alimin, müctəhidin və mərceyi-təqlidin qarşısında oturmuşuq və bir müctəhidlə görüş keçiririk".
O, qeyd edib ki, elm gözəldir və İslam insanları daim elm öyrənməyə təkid edir: "Azərbaycan torpağında da həmişə böyük elm adamları, müctəhidlər yetişib, yaşayıb. Məsələn, ayətullahül-üzma Şeyx Əbdulqəni Badi-Kubeyi, Şeyx Hüseyn Ramanayi, Şeyx Mirəbdülqəni Badi-Kubeyi, Şeyx Məhəmməd Lənkərani, Şeyx Mirsüleyman Salyani və b. Azərbaycan alimlərini saysaq, bir kitab olar. Azərbaycan həmişə müctəhidlərlə ünsiyyətdə olub. Lakin müstəqil olandan sonra Azərbaycana ilk dəfədir ki, bura böyük İslam alimi təşrif buyurur. Hamınızın gözəl tanıdığı rəhmətlik Şeyx Fazil Lənkərani də ağanın şagirdlərindən olub. Əlbəttə ki, belə bir alimin, özü də müctəhidin Azərbaycana gəlişi çox əlamətdardır".
Mədəniyyət Mərkəzinin sədri vurğulayıb ki, Şeyx Həmədaninin bir çox sahələrə aid elmi kitablarının Azərbaycan dilinə tərcümə olunması planlaşdırılır.
Din xadimi bildirib ki, Qarabağ qədim Azərbaycan torpağıdır və arzu edirəm ki, tez bir zamanda işğaldan azad olunsun.
Onun sözlərinə görə, qədim tarixə malik Azərbaycanda olmağından çox şaddır: "Məni bu ölkəyə dəvət etdiklərinə görə, Azərbaycan Prezidentinə, Şeyxulislam Allahşükür Paşazadəyə təşəkkür edirəm. İslam dini bərabərlik dinidir. Mən Azərbaycanda bu bərabərliyi bir daha gördüm. İndiki dövrdə müsəlmanların vəhdəti hər zamankından daha mühüm əhəmiyyət kəsb edir. Quranın da hökmüdür ki, müsəlmanlar qeyri-din qarşısında sərt, bir-birilə isə möhkəm vəhdətə və birliyə malik olmalıdırlar. Allaha şükür edirəm ki, səfərimdə bu məqsədə nail olmuşam".
O qeyd edib ki, bu gün ən mühüm məsələ müsəlmanların vəhdətinə nail olmaqdır. Azərbaycana səfərimdən də məqsəd vəhdət məsələsini möhkəmləndirmək, nəticəyə nail olmaqdır. Azərbaycana gələ bilməsini özü üçün Allahın böyük lütfü hesab edən müctəhid konfransda Azərbaycan ruhanilərinə və İslam alimlərinə bəzi tövsiyələrini çatdırıb: "Ruhaniyyəti, dini öyrənənlər əsas məsələləri diqqətdə saxlayıb təhsillərində lazımi uğur əldə etməlidirlər. Tələbələr bilməlidir ki, bizim peşəmiz ən şərəfli və bərəkətli peşədir. Biz peşəmizdə fəaliyyətə başlamazdan öncə onun nə qədər əhəmiyyətli olduğunu anlamalıyıq. Döyüşə, cihada gedən şəxs hazırlıq görməli, silahdan necə istifadə edə bilməsi ilə bağlı məşq etməlidir. Eləcə də din xadimi elmə sahib olmalı, özünü buna hazırlamalıdır. Ruhaniyyət üçün ilk əsas məsələ ixlas, səmimiyyətdir. Yəni işini Allah naminə, onun razılığını əldə etmək üçün həyata keçirməlisən".
Müctəhid əlavə edib ki, digər mühüm məsələlər iradə və planlarla bağlıdır: "İkinci əsas məsələ, güclü iradə, əzmkarlıqdır. Tələbə az dərs oxumaqla, az elmlə kifayətlənməməlidir. Böyük alimlər kimi böyük iradəyə malik olub elmi dərindən öyrənməlidir. Üçüncü əsas məsələ isə odur ki, iradədən əlavə, ciddi planları olsun. Yəni bu məsələyə həlledici məsələ kimi baxsınlar. Bu yol çalışqanların yoludur, tənbəllərin yolu deyil. Tənbəl insan bu yolda məqsədinə çata bilməz".
İslam aliminin fikrincə, dördüncü əsas məsələ nizam-intizam, planlı-məqsədli olmaqdır: "Bu məsələ tələbələr üçün xüsusi önəm daşıyır. Hər bir nizam-intizamlı şəxs müvəffəqiyyətlidir. Nizam-intizamsız şəxs uğursuzdur. Həzrəti Əli (ə.s) da buyurub ki, işlərinizdə nizam-intizamlı olun".
Mərceyi-təqlid bildirib ki, beşinci əsas məsələ təbələnin yazısının və nitq qabiliyyətinin rəvan olmasıdır: "Güclü yazıya və danışığa malik olmaq üçün ədəbiyyat və dilçiliyi bilmək vacibdir. Mən bu məsələnin üzərində xüsusilə təkidlə dayanıram".
Onun sözlərinə görə, tələbələr həm də gecələr ibadət etmələrini özlərinə adət etməlidirlər: "Hər bir tələbənin gün ərzində vaxtı olmalıdır ki, Allah-təala ilə gizli söhbət etsin. Mən də tövsiyə edirəm ki, ruhaniyyətə başlayan tələbələr özlərini gecə namazına adət etdirsinlər. Gecə namazı alimlərə əzəmət gətirir".
