Azər Allahverənov: “Nəticələr onu deməyə əsas verir ki, proqnozlaşdırılan hədəfə çatmaq mümkündür”
Prezident İlham Əliyev İslam İnkişaf Bankı Qrupunun 2026-cı il üzrə İllik Toplantılarının açılış mərasimində çıxışında bildirib ki, məqsədimiz Azərbaycan ərazisindən daşınan yüklərin həcmini iki dəfə artırmaqdır:
“Mən yalnız gələcəyə dair bir neçə prioritet istiqaməti xüsusi vurğulamaq istəyirəm. Onlardan biri, qeyd etdiyim kimi, bağlantıdır. Biz Azərbaycanı daha da güclü nəqliyyat-logistika mərkəzinə çevirməyə davam etməliyik. Məqsədimiz Azərbaycan ərazisindən daşınan yüklərin həcmini iki dəfə artırmaqdır. Hazırda bu göstərici təxminən 14–15 milyon ton təşkil edir və biz bu rəqəmi ikiqat artırmağı hədəfləyirik. Əlbəttə, bunun hamısı yalnız bizdən asılı deyil. Bu, həm geosiyasi vəziyyətdən, həm də regiondakı ümumi şəraitdən asılı olacaq. Lakin bunlar bizim planlarımızdır”.
Bütün bu deyilənlərin fonunda ekspertlər Azərbaycan üzərindən daşımaların iki dəfə artması perspektivini necə dəyərləndirir?
Sözügedən məsələyə aydınlıq gətirən millət vəkili Azər Allahverənov baki-xeber.com-a açıqlamasında bildirdi ki, Azərbaycan üzərindən daşımaların iki dəfə artması ehtimalı böyükdür: “Burada önəmli olan məsələ odur ki, Azərbaycanın əlverişli coğrafi ərazidə yerləşməsi ölkənin həm də yükdaşımalarda rolunu və əhəmiyyətini artırır. Bunun üçün də zəruri infrastrukturun, konkret olaraq dövlətin bu məsələ ilə bağlı strateji kursunun olması vacibdir. Bu baxımdan Azərbaycanın həyata keçirdiyi siyasətin məhz həmin strateji kursun tələblərinə uyğun olduğunu görürük. İldən-ilə Azərbaycan üzərindən daşınan yüklərin həcmi artır. Statistik rəqəmlərlə də bu məsələ təsdiqini tapmaqdadır. Cənab Prezident qeyd etdi ki, hazırda ölkə üzərindən daşınan yüklər 14–15 milyon ton təşkil edir. Yaxın illər ərzində bu rəqəmiun iki dəfə artacağı gözlənilir. Bunun üçün ilk növbədə zəruri infrastrukturun genişləndirilməsi həyata keçirilməkdədir. Bu istiqamətdə Azərbaycanın əldə etdiyi vacib nəticələr onu deməyə əsas verir ki, proqnozlaşdırılan hədəfə çatmaq mümkündür. Təkcə onu demək kifayətdir ki, təkcə 2025-ci il ərzində Orta Dəhliz üzrindən daşımaların həcmi rekord səviyyəyə çataraq 4,7 milyon ton təşkil edib. Bu, əvvəlki ilə nisbətən əhəmiyyətli artım nümayiş etdirərək ölkənin logistika potensialının və qlobal tranzit rolunun gücləndiyini göstərir. Nəzərə almaq lazımdır ki, bu rəqəm 2021-2022-ci illərdə qat-qat aşağı idi. 2026-cı ilin sonuna yükdaşımaların 5 milyon tonu ötəcəyi proqnozlaşdırılır”.
Millət vəkili onu da qeyd etdi ki, infrastruktur işlərinin görülməsi çərçivəsində Bakı limanı, yeni dəmir yollarının, Ələt Beynəlxalq Hava Limanının istifadəyə verilməsindən sonra yükdaşımaların həcmi daha da artacaq: “Bu gün Orta Dəhlizin bir qolu olan TransXəzər vasitəsi ilə daşınan yüklərin həcmi 5 milyon tona yaxındırsa, 2027-ci ilə qədər yükdaşımaların illik 10 milyon ton həcminə çatdırılması ilə bağlı konkret planlar var. Bu, bütövlükdə, ölkəmiz üzərindən daşınan yüklərin həcminin artmasına gətirib çıxaracaq. Çünki söhbət təkcə Şərqlə Qərbi əlaqələndirən nəqliyyat-logistika marşrutlarından getmir. Burada həm də Şimalla Cənubu əlaqələndirən çox vacib nəqliyyat marşrutundan söhbət gedir. Bu da faktiki olaraq böyük bir həcmdə yüklərin yaxın illərdə Frars körfəzinə çıxarılmasını nəzərdə tutur. Bu da nəticə etibarı ilə il ərzində daşınan tranzit yüklərin həcminin artmasına gətirib çıxaracaq. O baxımdan cənab Prezidentin qeyd etdiyi hədəf əlçatandır. Hətta yaxın bir neçə ildə daşınan yüklərin həcminin bir neçə dəfə artacağı gözlənilir. Xüsusən Zəngəzur dəhlizi istifadəyə veriləndən sonra ölkəmiz üzərindən daşınan yüklərin həcmi kəskin şəkildə artacaq. Bütün bunlar ölkəmizin bu istiqamətdə siyasətinin çox vacib uğurlarından biri kimi dəyərləndirilməlidir. Çünki Azərbaycan Şərqlə Qərb arasında özünəməxsus nəqliyyat xabı funksiyasını yerinə yetirməkdədir”.
Vidadi ORDAHALLI
