Liviya dövlətinin dünya dövlətləri tərəfindən tanınan demokratik qanadı İŞİD tərəfdarları ilə mübarizə aparmaq üçün Ərəb Dövlətləri Liqasından (ƏDL) yardım istəyib. Bu barədə baki-xeber.com New York Times-ə istinadən xəbər verir. Nəşrin xəbərinə görə, bu barədə Liviyanın xarici işlər naziri Məhəmməd əd-Dayri ƏDL-in Qahirədə baş tutan növbədənkənar iclasında bəyan edb. Onun sözlərinə görə, ölkəsinin ordusu "İslam dövləti”nə qarşi dirəniş göstərmək iqtidarında deyil. Məsələ burasındadır ki, son zamanlar koalisiyanın Suriya və İraqı bombalamasından qaçan İŞİD yaraqlıları Liviyaya üz tutur ki, bu da ölkədə gərginliyi əhəmiyyətli dərəcədə artırıb.
Ərəb Dövlətləri Liqasının baş katibi Nabil əl-Ərəbi Liviya XİN başçısının çağırışına müsbət yanaşaraq, Liqaya üzv dövlətləri bu ölkəyə dəstək verməyə dəvət edib.
Qeyd edək ki, 2011-ci ildə Müəmmər Qəddafiyə qarşı qalxan və onun devrilməsilə nəticələnən qiyamın ardından BMT bu ölkəyə silah embarqosu tətbiq edib. O zamandan bəri ölkə rəhbərliyi bu embarqonun qaldırılmasına dəfələrlə cəhd etsə də nəticə əldə olunmayıb. Ekspertlər, ölkəyə silah verilişi bərpa olunarsa, bu silahların terrorçuların əlinə düşməsindən ehtiyatlanır.
Onu da xatırladaq ki, Qəddafinin devrilməsindən sonra başlayan vətəndaş müharibəsi ölkədə ikihakimiyyətliliyə gətirib. Hazırda dünya tərəfindən tanınan demokratik iqtidar Tobrukda, islami iqtidar isə Tripolidə oturur.
