Tailand hərbi məhkəməsi iki ölkə vətəndaşı barəsində analoqsuz ölçü götürməsilə dünyanın gündəminə gəlib. Monarxiyanı təhqir etməkdə günahlandırılan kişi və qadın müvafiq olaraq 30 və 28 il həbs cəzası alıblar. Vəkillərinin sözlərinə görə, həmin maddə üzrə ilk dəfədir ki, belə uzunmüddətli həbs tətbiq olunur.
30 il həbs almış 48 yaşlı Ponqsak Şribunlenq keçmiş eks baş nazir Taksin Çinnavatın tərəfdarıdır. O, ötən il çevriliş nəticəsində hakimiyyətə gəlmiş hazırkı ölkə başçısını "facebook”da 6 dəfə təhqir etməsinə görə bu cəzaya layiq görülüb. Əvvəlcə məhkəmə ona 60 il cəza istəyib, lakin günahını etiraf etdiyinə görə cəzasının yarıbayarı azaldılmasına qərar verilib.
İkinci, 29 yaşlı Sasivomal da "facebook”un qurbanlarındandır. Eyni maddə ilə məhkəmə qarşısına çıxarılan bu xanıma isə məhkəmə 56 il həbs cəzasi istəyib və günahını etiraf etməsilə bu müddət "cəmi” 28 ilə endirilib.
Qeyd edək ki, hərbçi-monarxistlərin hakimiyyətə gəlməsilə Tailandda bir çox məhkəmə işləri hərbi məhkəmənin icraatına keçib. Göstərilən maddə ilə həbs olunanların sayı isə bir il ərzində 51 nəfərə çatıb. Tailand hökumətinin sözçüsü deyir ki, biz qanunvericilikdə heç bir dəyişiklik etməmişik, baş verənlər bizdən əvvəlki hökumətin qanunvericilikdə yaratdığı boşluqlar üzündən yaşanır. Hakimiyyətin təhqir olunmasına gəldikdə isə, bu yalnız 87 yaşlı kral İX Ramanın səhhətilə bağlı gəzən şayiələri əhatə edir. Məsələ burasındadır ki, bu ilin may ayında kral səhhətindəki problemlərlə əlaqədar hospitala yatırılıb və onun hansı durumda olduğu barədə ictimaiyyətə heç bir açıqlama verilmir. Belə vəziyyət isə ölkədə şaiyələrin baş alıb getməsinə səbəb olub.
