Rusiyanın "Arqumentı i faktı” qəzeti bu mövzuda maraqlı yazı ilə çıxış edib. Baki-xeber.com-un xəbərinə görə, Yekaterina Mirnaya adlı müəllifin imzası ilə gedən yazıda "hesablaşma vaxtı”nın gəlib çatdığı və ölkənin bütün sərvətinin dəyər-dəyməzinə satışa çıxarıldığı bildirilir. Müəllifin sözlərinə görə, bu məqsədlə Yatsenyuk şəxsən özü ABŞ-a gedib. Bildirildiyinə görə, 1300 zavod və fabrik hərraca çıxarılıb. Müəssisələrin "su qiymətinə” təklif olunduğu iddia edilən yazıda göstərilir ki, buna qədər Kiyev özəlləşmədən 29 milyard gəlir gözləyirdi, indi isə bu rəqəm 771 milyona enib. Müəllifin dediyinə görə, Ukrayna "enerji islahatı” adı altında özünün bütün enerji sektorunu və kimya müəssisələrini ABŞ-a verməyə hazırlaşır. Vaşinqtonun bu barədə özünün xüsusi planları olduğunu yazan müəllif maraqlı faktlar da gətirir. Bildirilir ki, "Cənub” adlı Odessa limanında sıxılmış qazın ilkin terminalının tikilməsi nəzərdə tutulur. Eyni zamanda Yatsenyukun ABŞ səfəri ərəfəsində bu ölkənin Ukraynadakı enerji konserni "Shevron”un buranı birdəfəlik tərk etməsi də təsadüf sayılmır. Müəllif diqqəti həm də ona çəkir ki, Maydan hadisələrindən dərhal sonra ABŞ vitse-prezidentinin kiçik oğlu Hanter Bayden "Burisma” Ukrayna konserninin direktorlar şurasına gətirilib. Onun burada daha bir "kolleqa”sı isə Con Kerrinin mənəvi oğlu Kris Haynsın biznes ortağı Devon Arçerdir. Müəllif iddia edir ki, aktivlərin lazımi əllərə çatması üçün bu işi hazırda Ukraynanın maliyyə naziri, ABŞ vətəndaşı N.Yereskoya həvalə ediblər. Yazıda bildirildiyinə görə, indiyə kimi Ukraynada torpaqların şəxsi əllərə satışı qanunla qadağan olunub. Lakin bu il moratorium aradan qaldırılıb. Bu sahəyə isə dərhal məşhur Corc Soros maraq göstərib və bildirib ki, milyard dollar investisiya qoymağa hazırdır. Rotşildlərin investisiya fondu isə Ukraynanın borc öhdəliklərilə məşğul olmağı öhdəsinə götürüb. Bloomberg-in iddiasına görə, ölkənin suveren borclarının əhəmiyyətli hissəsi onların marağı üçün alınıb. Rothschild&Cie müəssisəsinin icraçı direktoru Covanni Salvetti etiraf edib ki, onları Ukraynanın qaratorpaq əraziləri maraqlandırır. Görünür, borclar torpaqlar hesabına qapanacaq.
Müəllif sonda onu da qeyd edir ki, həmin bu sxem üzrə 10 il əvvəl Kamboca, Qana, Efiopiya, Argentina və s. ölkələrin torpaqlarına da əl qoyulmuşdu.
