"Azərbaycanda "ASAN xidmət" mərkəzlərinin sayı artdıqca, vətəndaşların hansı region üzrə qeydiyyatından asılı olmayaraq, istənilən şəxsə xidmət göstəriləcək".
Bunu jurnalistlərə açıqlamasında Azərbaycan Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədr müavini Ülvi Mehdiyev deyib. Onun sözlərinə görə, hazırda bu istiqamətdə iş aparılır: "Gələn ildən etibarən, qeydiyyat yerindən asılı olmayaraq, bütün vətəndaşlara xidmət göstərə biləcəyik. Bu məsələdə bizə çətinlik yaradan əsas amil bütün regionlarda mərkəzlərin olmamasıdır. Növbəti ildən isə Qəbələ və Masallı şəhərlərində "ASAN xidmət" mərkəzləri fəaliyyətə başlayacaq".
Sədr müavini həmçinin qeyd edib ki, hazırda 6 regionda səyyar avtobuslar fəaliyyət göstərir: "Həmin avtobuslardan 1-i Şəkidə, digərləri Yardımlıda, Qazaxda və Bakıətrafı ərazilərdə vədəndaşlara xidmət göstərir. Səyyar "ASAN xidmət" vasitəsilə, 6 rayon olmaqla, 17 regionun vətəndaşlarına xidmət edirik. Hazırda səyyar xidmət avtobuslarının sayı 10-a çatdırılıb və hamısı xidmət göstərir".
Onu da qeyd edək ki, hazırda respublikada 9 "ASAN xidmət" mərkəzi fəaliyyət göstərir. Onlardan 5-i paytaxt Bakıda, digərləri Sumqayıt, Gəncə, Sabirabad və Bərdədədir. Görünən odur ki, "ASAN xidmət" mərkəzlərinə müraciət edən ölkə vətəndaşlarının sayı ilbəil artır. Çünki sözügedən xidmət sahələri əhalinin rahatlığına xidmət edir.
Maraqlıdır, vətəndaşların hansı region üzrə qeydiyyatından asılı olmayaraq, istənilən şəxsin "ASAN xidmət" mərkəzinə müraciət etməsinin nə kimi üstünlükləri var?
Məsələyə münasibət bildirən ekspert İlqar Hüseynlinin sözlərinə görə, bunun bir sıra üstünlükləri var: "Hər şeydən əvvəl, bu, əhalinin rahatlığına xidmət edir. Son illər aparılan müşahidələr də göstərir ki, əhali mərkəzin göstərdiyi xidmətlərdən çox razıdır. Regionlar üzrə qeydiyyat məhdudiyyətinin aradan qaldırılmasının isə üstünlükləri daha çox olacaq. Məsələ ondadır ki, Bakıda on minlərlə rayon qeydiyyatında olan vətəndaş yaşayır. Belə ki, burada, sənədsiz də olsa, özünə ev tikib, illərdir paytaxtda yaşayır, ailəsi, uşağı var, amma rayon qeydiyyatındadır. Həmin insanlar şəxsiyyət vəsiqəsinin vaxtı qurtaranda, hansısa digər sənəd almaq zərurəti ortaya çıxanda rayona getmək məcburiyyətində qalır, ya da regionlarda yerləşən "ASAN xidmət" mərkəzlərinə müraciət edirlər. Bu da əlavə problemlər yaradır. Problem ondan ibarətdir ki, buna görə vətəndaşlar işdən olur, gedib-gəlməkdən ötrü müəyyən vəsait xərcləyir və s. Çox vaxt sözügedən problemlər üzündən vətəndaşlar vaxtında sənədləri dəyişdirə bilmir. Bir məqamı da qeyd edim ki, bayram günləri "ASAN xidmət" mərkəzləri işləmir. Belə bir məhdudiyyət gələn il aradan qaldırıldıqdan sonra şübhəsiz ki, bu, vətəndaşların işini xeyli rahatlaşdıracaq. Ona görə də bunun əhəmiyyəti böyükdür".
Vidadi ORDAHALLI
