"Bakı-Xəbər" qəzetinin Baş redaktoru, politoloq Aydın Quliyev özünün facebook səhifəsində maraqlı paylaşım edib.
A.Quliyev yazır:
"Rusiya prezidenti Putin Pekində olarkən Azərbaycanla "münasibətlərdə problem var" deyərək etiraf edib. "Fundamental əlaqələr və onu inkişaf etdirmək istəyi hər şeyi yerinə qoyacaq. Prezident İlham Əliyevlə və həyat yoldaşı ilə görüşdük, 2- 3 kəlmə danışdıq" deyib...
İki ölkənin münasibətlərində yeni mərhələnin açılması baxımından Putinin fikirləri məncə dərin və uzaq nəticələr çıxarmağa o qədər də əsas vermir. Nə deyib ki?
Münasibətlərdə problemin olduğunu Putin kimi biz də bilirik. Mövcud problemin mahiyyəti barədə Azərbaycan prezidenti kimi nisbətən izahlı və təfsilatlı danışsaydı, nəyəsə ümid etmək olardı. Belə görünür ki, cənab Putin "problemin" kökü barədə danışmadan problemi həll etməyi düşünür ki, heç bir politoloji və konfliktologi nəzəriyyədə bu üsul uğurlu sayılmır...
"Hər şeyi yerinə qoyacaq" sözləri isə sanki "problemin" öz- özünə ortadan qalxacağı kimi inanılmaz təəssürat yaradır. "Problemin" aradan qalxmasını istəyən tərəf ilk növbədə bu yöndə real addımlar atmalıdır. Həmin real addım isə "2-3 kəlmə danışmaqdan" ibarət deyil və ola bilməz.
İki ölkənin, Putinin öz sözləri ilə desək "fundamental əlaqələrində" 9 aydan çox müddətdə problem yaranıb və bu müddətdə cənab Putinin etdiyi "2-3 kəlmə danışmaqdan" başqa şey deyil. Halbuki bu müddətdə problemin əsas mənbə tərəfi olaraq Putin bütün Azərbaycanı qane edən addımlar ata, izahlar verə, İlham Əliyevlə "2-3 kəlmə" yox, fundamental müzakirə üçün lazımı hərəkətləri etməli idi.
Putinin yaxınlaşaraq bizim Prezidentlə və onun xanımı ilə salamlaşması nə qeyri- adi bir jestdur ki, buradan "Rusiya Azərbaycanla münasibətlərdə yumşaldıcı jest etdi" kimi çox təntənəli nəticə çıxardaq?! Putin zala daxil oldu, həmin an Azərbaycan prezidenti və xanımı bir addımlıqda idilər, Putinin yaxınlaşıb əl tutmaqdan və salamlaşmaqdan başqa hansı variantı var idi ki?! Küsülü uşaqlar kimi başını aşağı salıb düz keçməli deyildi ki?!.. İnanıram ki, onun yerində İlham Əliyev də olsaydı, ondan da artıq nəzakətlə yaxınlaşıb salamlaşardı. Başqa cür etməzdi. Bu həm də diplomatik səviyyə məsələsidir.
Bizim Putindən gözlədiyimiz daha böyük addımlar var, nəinki ayaq üstündə "1-2 kəlmə danışmaq" jesti...
Azərbaycan-Rusiya münasibətlərinin məhz "fundamenti" zədələnib. Həm də Rusiyadan zədə alıb...
Putinin öz sözünə istinad etsək, bu zədəli fundamentə söykənərək "hər şeyin öz yerini tutacağına" inanmaq düz deyil... Fundament zədələnibsə, əvvəlcə bu zədəni aradan qaldırmaq lazımdır..."
Mətləb
