Mətləb Salahov: ”Paşinyan öncə Vaşinqtonda, indi də Çində özünü sülhsevər imicdə göstərsə də, sülh üçün konkret heç bir addım atmır”
“Nikol Paşinyan həm Vaşinqtonda, həm də yenicə Çində keçirilən beynəlxalq Sammitdə özünü kifayət qədər sülhpərvər, Azərbaycan və Türkiyə ilə inteqrasiyaya hazır hökümət rəhbəri kimi göstərməyə çalışsa da, hesab edirəm ki bu hələ görüntüdür. Çünki hələ ki, rəsmi İrəvan sülh Müqaviləsini reallaşdırmaq, Azərbaycan və Türkiyə ilə inteqrasiya üçün barmaqla sayılacaq qədər azacıq addım da atmayıb.” Bu fikirləri “Bakı Xəbər”ə açıqlamasında jurnalist-ekspert Mətləb Salahov bildirib. O qeyd edib ki, Ermənistan hakimiyyətinin yüksək vəzifəli şəxsləri, konkret olaraq xarici işlər naziri Ararat Mirzoyan artıq Konstitusiya məsələsində nala-mıxa vurmağa başlayıb. Erməni nazir ölkə KİV-lərinə açıqlamasında görün nə deyir: “Vaşinqtonda heç bir Konstitusiya müzakirə olunmayıb və bizim üçüncü bir ölkə qarşısında onu dəyişmək kimi öhdəliyimiz yoxdur”. Bu adam açıq-aşkar, bilərəkdən rəsmi İrəvanın Vaşinqton görüşündə öz üzərinə götürdüyü öhdəlikləri təhrif edir. “Çünki qundaqdakı körpəyə də məlumdur ki, Azərbaycanla Sülh Müqaviləsi imzalamaq üçün rəsmi Bakı Ermənistan Konstitusiyasında Azərbaycana qarşı ərazi iddiaları ilə dolu müddəaların ləğv edilib tarixin zibilliyinə atılmasını istəyir. Hansı ki, dəfələrlə N.Paşinyanın özü hazırkı Ermənistan Konstitusiyasının korrektə edilməsinin vacibliyini hökümət iclaslarında bəyan edib. Bəs belə olan halda A.Mirzoyanın Sülh Müqaviləsi üçün əsas maniə sayılan bu prosesə qarşı açıq “buynuz göstərməsinin” səbəbi nədir?. Məgər bu saqqalı erməni nazir anlamır ki, Edrmənistan Konstitusiyasında o təcavüzkarlığa əsas verən müddəalar silinib atılmasa heç bir Sülh Müqaviləsindən söz gedə bilməz? Şəxsən mən düşünürəm ki, erməni xislətində olan riyakarlıq intuisiyası A.Mirzoyanda yüksək dərəcədədir. Hazırda Çində səfərdə olan N.Paşinyanın sülh ritorikası ilə onun nazirinin bu açıqlaması arasında dərin uçurum var. Ən vacib məqam odur ki, A.Mirzoyan bu açıqlama ilə hazırkı Ermənistan rəhbərliyinin üzdə göründüyü kimi “sülh üçün alışıb yanan” bir hakimiyyət olmadığını bizə göstərir.”
Namiq Quliyev
