Azər Həsrət: “Amerika öz sözünə, imzasına kifayət qədər hörmət edən dövlətdir”
Məlum olduğu kimi, Azərbaycanla Ermənistan arasında sülh sazişi paraflandı. Beləliklə, ABŞ-da üç lider - İlham Əliyev, Donald Tramp və Nikol Paşinyan arasında tarixi görüş reallaşdı. Bu, regionda ABŞ-ın birbaşa diplomatik iradəsi və vasitəçiliyi ilə atılmış ən ciddi addım kimi qiymətləndirilir.
Qeyd edək ki, Azərbaycanla Ermənistan arasında sülh sazişinin imzalanmasında bir çox ölkələr, o cümlədən Rusiya maraqlı olub. Hətta Rusiya bu işin reallaşması üçün səy də göstərib, ancaq istənilən nəticə alınmamışdı. ABŞ hökumətinin səyi sayəsində isə 30 ildən çox davam edən münaqişə sonlandı.
Maraqlıdır, Donald Tramp Azərbaycanla Ermənistanın arasında münasibətlərin normallaşmasına təsir göstərmək təşəbbüsünü Rusiya prezidenti Putinin əlindən aldımı?
“Rusiyanın iştirak etdiyi istənilən saziş suya yazılmış yazı kimidir, Rusiyanın olduğu yerdə etibar, etimad yoxdur”
Siyasi şərhçi Azər Həsrət baki-xeber.com-a şərhində bildirdi ki, Azərbaycan Prezidenti ilə Ermənistan Baş nazirinin sülh sazişi ilə bağlı imzaladıqları sənəd Guney Qafqazın tarixində yeni mərhələnin başlanğıcıdır: “Çox sevindirici haldır ki, bu başlanğıca Rusiya deyil, Amerika öz damğasını yaxşı mənada vurdu. Hər kəsə bəllidir ki, Rusiyanın iştirak etdiyi istənilən saziş suya yazılmış bir yazı kimidir. Rusiyanın olduğu yerdə etibar, etimad yoxdur. Bu səbəbdən də Rusiya belə bir görüş keçirib nəticə əldə etmiş olsaydı, biz imzaların şübhə altına salındığının şahidi olacaqdıq. Ancaq Amerika öz sözünə, imzasına kifayət qədər hörmət edən dövlətdir. Prezident Donald Tramp bu məsələdə olduqca ciddidir. Bu səbəbdən də məlum görüşün Amerikada, Ağ Evdə keçirilməsi bizə ümid verir. Bəli, Rusiya tam olaraq bölgədən sıxışdırılır. Zəngəzur dəhlizi ilə bağlı gəlinən nəticə onu deməyə əsas verir ki, artıq Rusiya öz şələ-küləsini yığışdırıb Ermənistandan da çıxıb getməlidir. Eyni zamanda, qonşu İranın da “qırmızı cizgiləri” yetərincə sərt bir şəkildə onun sifətinə çırpıldı. Bundan sonra İran “qırmızı cizgimizdir” kimi bəyanatlar səsləndirə bilməyəcək. Bu cür ifadələr işlətsə, artıq Amerika danışmalı, etirazını ona bildirməlidir”.
Ekspert hesab edir ki, Rusiya ilə İranın bölgədə sıxışdırılması yaxşı haldır: “Azərbaycana qarşı heç vaxt təcavüzkarlıq etməmiş Amerika Birləşmiş Ştatlarının bölgəyə gəlməsi böyük üstünlükdür. Eyni zamanda, Amerika qardaş Türkiyənin də yaxın tərəfdaşıdır. Türkiyə ilə Amerika arasında heç bir problem yoxdur. Xüsusilə Rəcəb Tayyiblə Tramp arasında münasibətlər normaldır. Azərbaycan Prezidentinin strateji uzaqgörənliyi yenə öz sözünü dedi. Biz guney Qafqaz olaraq, quzey Qafqazda baş verən hadisələri nəzərə alsaq, Rusiya yaxın illər ərzində Azərbaycanla həmsərhəd ölkə olmayacaq. Yəni quzey qafqaz xalqları da azadlığına qovuşacaq və quzeydəki sərhədimiz dost Dağıstanla olacaq”.
Günel CƏLİLOVA
