Mətləb Salahov: “Samvel Karapetyan həbsxanadan partiya yaratdığını elan edir, amma Sarkisyanın və Köçəryanın üzünə “qapıları” bağlayıb”
“Hazırda Ermənistanda seçki ərəfəsi gərginlik yaşanır. Keşişlərin hörmətdən salınıb ictimai proseslərdən kənarlaşdırılması, habelə erməni əsilli Rusiya vətəndaşı olan milyarder, “Putinin oliqarxı” kimi ad çıxarmış Samvel Karapetyanın həbs edilib əmlakına əl qoyulması açıq şəkildə erməni hakimiyyətinin rəqiblərinin “başını erkən əzmək” işində qəti qərarlı olduğunu göstərir”. Bu barədə “Bakı Xəbər”ə açıqlamasında jurnalist-ekspert Mətləb Salahov bildirib. O xüsusilə qeyd edib ki, hazırda erməni baş nazir Qərbdəki aparıcı qüvvələrin də dəstəyini almaqla seçkilərə qədər ona qarşı duran qüvvələri tamamilə zərərsizləşdirməyə çalışır: “N.Paşinyan artıq Brüsseldədir. Çox güman ki, erməni baş nazir Ermənistanın dərd-sərindən daha çox öz şəxsi hakimiyyət məsələlərini müzakirəyə çıxaracaq. Xüsusilə N.Paşinyanı narahat edən əsas məqam S.Karapetyanın həbsxanadan bəyanat yayaraq siyasi partiya yaratdığını elan etməsidir. S.Karapetyan bəyanatında qeyd edir ki, “mübarizə üçün tam yeni yol seçəcək və skiyasi fəaliyyətini real siyasi vəziyyətlə əlaqələndirəcək.” Açıq şəkildə görünür ki, Rusiya artıq Ermənistan planını S.Karapetyanın üzərində qurub. Əlbəttdə Ermənistandakı körpə uşağa da məlumdur ki, erməni əsilli milyarderi bu proseslərə Moskva sürükləyir. Çox aydındır ki, Rusiya Serj Sarkisyan və Robert Köçəryan kimi ləkələnmiş keçmiş nökərlərini yeni siyasi proseslərdən kənar tutacaq. Çünki artıq onlar Ermənistan cəmiyyəti üçün də siyasi ölüdürlər. Belə olan halda yeni sima kimi S.Karapetyana “stavka edilməsi” normal haldır. Beləliklə, Moskva Ermənistanda yeni sima ilə ortaya çıxmağa və təşkilatlanmağa hazırlaşır”.
Namiq Quliyev
