Artıq elə bir dövrdə yaşayırıq ki, bütün nizam qaydaları, mənəvi sərhədlər, min illik adət və ənənələr internet əsrində köhnəlmiş əşya kimi yoxa çıxarılıb. İş o yerə çatıb ki, cəmi 10-15 il bundan əvvəlki dəyərlər sistemini, ictimai qınaq qaydalararını bu gün çıraqla axtarırıq. Dünyanın inkişaf etmiş xalqları günümüzdəki texnologiya, internet yeniliklərindən inkişaf etmək, qabağa getmək üçün yararlanırlarsa, bizdə tam əksinədir. İnternet, Tik-tok əsrində İlon Masklar başqa planetlərdə yaşamaq üçün yollar axtarır, aya uçur, mənim cəmiyyətimdə isə hər gün bir ağıldankəm özünü “peyğəmbər”, “imam zaman” elan edir, bir başqa dələduz da cənnətə göndərmək adı ilə Azərbaycan cəmiyyətindəki xurafat şüurlu insanları aldadıb om minlərlə manat pullarını qamarlayır.
Təsəvvür edirsiniz, internet əsrində “cənnətə viza” komediyası, “axır zaman” biabırçılığı, bir qrup “dindarın” avam kütlədən istifadə edib qaz vurub qaza doldurması, Həcc ziyarəti üçün bir nəfərdən nə az nə çox, düz 10 min manat pulun alınması! Həcc, Kərbəla, Məşhəd adı ilə insanları aldadıb milyon qazanan “dindar” işbazlar cəmiyyətimizdə at oynadırlar. Din adı altında avam insanların aldadılıb soyulması desək daha düz çıxar. Sonra da Donald Tramp Səudiyyə Ərəbistanına, Qətər və Ərəb Əmirliklərinə gedib 3 trilyard dollarlıq “şapka” alır, üstəlik bu müsəlman ərəblər ona 400 milyon dollarlıq təyyarə hədiyyə edib Vaşinqtona yollayırlar. Amma bu ərəblərdən o tayda, Qəzzada isə müsəlman körpələr bir kiloqram un, bir litr su üçün həyatlarını qurban verirlər. Bu da sənə “cənnət”! Nə isə gələk əsas mövzuya. Mövzu da odur ki, artıq uşaq və yeniyetmələrimiz internet və mobil telefon xəstəliyinə tutulublar. Özü də dəhşətli dərəcədə! İş o həddə çatıb ki, artıq övladlar öz valideynlərini deyil, nəzarətsiz tik-tokdakı iyrənclikləri “seçir”, onları örnək götürür, bu azmış kimi ölümcül telefon manyakına çevrilirlər. Bu yaxınlarda Xaçmaz rayonunda 17 yaşlı yeniyetmənin mobil telefonu ondan gizlədən anasına düz 17 bıçaq zərbəsi vurub öldürməsi bütün bu söylədiklərimə ən bariz sübutdur. Qonum-qonşunun son dərəcə tərbiyəli, sakit gənc kimi xarakterizə etdikləri bu yeniyetmənin ona telefon verməyən doğma anasına 17 bıçaqla zərbə endirib qətlə yetirməsi həm də cəmiyyətimizin acınacaqlı vəziyyətini ortaya çıxarır. İndi nəinki 17 yaş, hətta 2-3 yaşlı körpələri belə telefondan ayırmaq müşkül məsələyə çevrilib.
Bu gün Azərbaycanda heç bir texnologiya təyinatı üzrə istifadə olunmur. Görməmiş kimi, ən yeni çıxan mobil telefonlar alınıb uşaqlara verilir. Sanki bununla necə “önəmli valideyn olduqlarını” sübuta yetirirlər. Ən bahalı mobil telefon seriyaları ən kasıb, kirayədə qalan azərbaycanlının evində baş köşədədir. Niyə, nə məcburdur kasıb halınla “qonşudan geri qalma” yarışına girəsən? Axı mobil telefon uşaq və yeniyetmələr üçün deyil! Diqqət edin, dünyanın ən inkişaf etmiş ölkələrində - bura İtaliya, İspaniya, ABŞ, Almaniya, Çexiya kimi ölkələr daxildir – bu ölkələrdə uşaq və yeniyetmələrin məktəblərdə mobil telefondan istifadəsi qadağan olunub, üstəlik 17 yaşdan aşağı şəxslərin sosial şəbəkələrə girişi mümkün deyil. Çünki bütün bunlar o ölkələrdə qanunla qadağan olunub. O ölkələr bu addımlarını sosial şəbəkə platformasının uşaq və yeniyetmələrin psixologiyasına və inkişafına ölümcül zərbə vurması ilə əsaslandırırlar. Dəlidirlər, yoxsa ağılları bizdən çox zəifdir?- qətiyyən! Onlar öz gələcəklərini düşünürlər. Amma bizdə necədir vəziyyət? İndi körpə uşaqlar da tik tok istifadəçisidir. Cinsi azlıqlardan tutmuş qatı cinayətkarlara, ləçər küçə qadınlarına qədər bütün bu sadaladıqlarım tərbiyə edir indiki azyaşlı nəsillərimizi. Yoxsa yalanmı deyirəm? Bütün uşaqlar gün boyu sosial şəbəkədə eşələnirlər. Məsuliyyətsiz valideynlər də can rahatlığı üçün onları başdı-başına buraxır, heç nə olmayıbmış kimi həyatlarına davam edirlər. Heç cürə dərk etmirlər ki, öz övladlarını “əmanət” etdikləri Tik Tok, digər sosial şəbəkələr günümüzün gerçək QATİLİDİR! Övladlarınızı dövrümüzün qatili olan telefon-internet asılılığından indidən xilas edin. Çünki sabah daha çox gec olacaq, lap gec...
