Xankəndi görüşü regional əməkdaşlıq üçün mühüm körpüdür
Mətləb Salahov: “Bu Zirvə görüşü həm də işğaldan sonrakı Qarabağın sürətli dirçəlişinə baxışdır”
“Xankəndidə keçiriləcək İqtisadi Əməkdaşlıq Təşkilatının (İƏT) 17-ci Zirvəsi ilk növbədə Azərbaycanın bölgə siyasətində oynadığı mühüm birləşdirici rolu sərgiləyir. Çünki həm iqtisadi imkanları, həm də geosiyasi proseslərdəki siyasi çəkisi rəsmi Bakının bölgə ölkələri üçün cazibə qüvvəsinə çevrilməsini təmin edir. Rusiya – ABŞ, Rusiya – NATO münasibətlərindən başlamış ən kritik beynəlxalq məsələlərə qədər Bakının görüş yeri kimi seçilməsi həm də Azərbaycana olan etimadın nümunəsidir. İƏT üzvü olan dövlət və hökümət başçılarının Xankəndiyə toplanması və təşkilatın gələcəyi ilə bağlı kiritik müzakirələrin keçirilməsi artıq həm də ölkəmizin nüfuz göstəricisidir.” Bu fikirləri “Bakı Xəbər”ə açıqlamasında jurnalist-ekspert Mətləb Salahov bildirib. O qeyd edib ki, Azərbaycanın hazırkı iqtisadi potensialı üzv dövlətlərlə geniş əməkdaşlıq əlaqələrinin qurulması üçün imkanlar yaradıb. O diqqətə çatdırıb ki, Zirvə görüşünün işğaldan azad olunan torpaqlarda keçirilməsi Azərbaycanın növbəti diplomatik uğurlarından biridir.
“Olduqca mühüm bir məqama toxunaq. Beynəlxalq iqtisadi toplantının Xankəndidə təşkili əlamətdar hadisədir.
Çünki bu mötəbər tədbirin təşkili həm də Xankəndini diqqət mərkəzinə gətirir. 30 ildən çox erməni separatizminin əsarətində olmuş bu qədim Azərbaycan şəhərində heç bir rəsmi tədbir və yaxud beynəlxalq konfrans keçirilməyib. Bu sammit həm də onun göstəricisidir ki, Qarabağ artıq münaqişə zonası deyil, sülh, dayanıqlı inkişaf və iqtisadi əməkdaşlıq üçün bir platformadır. Bu Zirvə görüşü həm də işğaldan sonrakı Qarabağın sürətlə davam edən dirçəlişinə beynəlxalq baxış olacaq. Bu isə çox-çox önəmli hadisədir.”
Namiq Quliyev
