Azərbaycan - Türkiyə... Bu gün dünya birliyində bu iki qardaş ölkə arasındakı münasibətlərin bənzəri yoxdur. Şərqdən qərbə, Şimaldan Cənuba qədər bütün qitənin bildiyi tək həqiqət var: Azərbaycan və Türkiyə iki qardaş və strateji tərəfdaşdırlar. Dostlarımız da, düşmənlərimiz də bizim qardaşlığımızın qədim köklərə söykəndiyini yaxşı bilirlər. Ölkəmizdə keçirilən növbədənkənar prezident seçkilərindən sonra Prezident İlham Əliyevin 19 fevral tarixində ilk rəsmi səfərinin Ankaraya olması ölkələrimiz arasındakı tarixi bağları, müttəfiqliyimizi, həmçinin əlaqələrimizin inkişafının göstəricisidir. İki qardaş dövlət başçılarının fevralın 19-da qarşılıqlı görüşü zamanı hərtərəfli əməkdaşlığımızı əhatə edən bir sıra mühüm sənədlər imzalanıb. Bu sənədlər Azərbaycan-Türkiyə münasibətləri üçün yeni səhifənin başlanğıcıdır. Artıq əlaqələrin ən müxtəlif sahələrdə konkret addımlarla genişləndirilməsi planlaşdırılır. Bunlardan biri də Türkiyə-Azərbaycan Universitetinin yaradılmasına dair Memorandum imzalanıb. Azərbaycan-Türkiyə birgə universitetinin yaradılması iki ölkə arasında təhsil sahəsində yeni əməkdaşlığın əsasını qoyacaq. "Bizim ailəmiz türk dünyasıdır. Biz özümüzü çox yaxşı hiss edirik. Türk Dövlətləri Təşkilatına üzv olan bütün ölkələrlə qardaşlıq münasibətlərimiz var və bizim siyasətimiz Türk Dövlətləri Təşkilatını gücləndirməkdir. Bu, böyük coğrafiyadır, böyük ərazidir, böyük hərbi gücdür, böyük iqtisadiyyatdır, təbii sərvətlərdir, nəqliyyat yollarıdır, gənc əhalidir, artan əhalidir və bir soydan, kökdən olan xalqlardır. Bundan güclü birlik ola bilərmi? Əlbəttə ki, yox. Biz müştərək səylərlə elə etməliyik ki, Türk Dövlətləri Təşkilatı qlobal arenada önəmli aktora və güc mərkəzinə çevrilsin. Buna biz ancaq birlikdə nail ola bilərik." Azərbaycan Prezidenti İlham Əliyevin Türkiyə Prezidenti Rəcəb Tayyip Ərdoğanla keçirdikləri birgə mətbuat konfransında səsləndirdiyi bu fikirlər təkcə münasibətlərimizin qardaşlığını göstərmir. Bu fikirlər həm də iki qardaş ölkənin Türk Birliyinin yaradılması istiqamətində çoxşaxəli fəaliyyətinin göstərcisidir. Azərbaycan və Türkiyənin bütün sahələrdə əlaqələrinin yüksələn xətlə inkişafı, ümumilikdə münasibətlərimizin dünyaya bir qardaşlıq nümunəsi olması dövlət başçısı İlham Əliyevin "Bu gün Türkiyə-Azərbaycan birliyi təkcə bölgə üçün deyil, Avrasiya üçün önəmli amilə çevrilib" fikirlərinin təqdimatıdır. O da danılmaz tarixi faktdır ki, Azərbaycan və Türkiyə xalqları əcdadların bütün ənənələrinə sadiqdirlər. Türkiyə Prezidenti Rəcəb Tayyib Ərdoğan mətbuata bəyanatında xüsusi qeyd edib ki, Azərbaycan ilə əməkdaşlığımızın Ümummilli Lider Heydər Əliyevin vurğuladığı "Bir millət, iki dövlət" şüarı əsasında irəlilədiyini görürük.
Müasir dünyada gedən proseslərin fonunda Azərbaycan ilə Türkiyə arasında, ilk növbədə, məhz hərbi-siyasi sahədə əməkdaşlığın dərinləşdirilməsi getdikcə öz əhəmiyyətini artırır. Təsadüfi deyil ki, dövlət başçılarının keçirdikləri geniş tərkibli görüş zamanı cənab Prezident İlham Əliyev hərbi sahədə və müdafiə sənayesi sahəsində əməkdaşlığın önəmini xüsusi vurğulayıb. Azərbaycan Prezidenti prezident seçkilərindən iki gün sonra şəxsən iştirak etdiyi ilk tədbirin də "Bayraktar Akıncı" PUA-sının təqdimatı olduğunu diqqət mərkəzinə gətirib. Bu fakt birbaşa Azərbaycanla Türkiyə arasındakı hərbi bağların da tarix boyu olduqca önəm daşıdığını bir daha diqqət mərkəzinə gətirir. Təsadüfi deyil ki, bu gün Azərbaycan ilə Türkiyə arasında müdafiə sənayesi sahəsində əməkdaşlıq dinamik şəkildə inkişaf edir və genişlənir. Təbii ki, Azərbaycan səmasında PUA-ların uçması ölkəmiz üçün yeni imkanlar yaradır. Amma ən əsası Türkiyə istehsalı olan PUA-lar düşmənlərimizə, Azərbaycanı gözü götürməyənlərə ən böyük göz dağıdır. Əlaqələrini artıq rəsmi olaraq strateji müttəfiqlik səviyyəsinə yüksəltmiş iki qardaş ölkənin bilavasitə hərbi sahədə əməkdaşlıq əlaqələri xüsusi önəm kəsb edir. Azərbaycan Prezidentinin Türkiyə səfəri zamanı bəyan etdiyi kimi, bu gün Azərbaycan və Türkiyə orduları bir yumruq anlamına gəlib və hər il ən azı 10 hərbi təlim həm Türkiyədə, həm də Azərbaycanda keçirilir. Əlbəttə ki, bütün bunlar ölkələrimizin hərbi qüdrətinin artmasına xidmət edir.
Azərbaycan və Türkiyənin birgə tərəfdaşlıq əlaqələrinin inkişafına digər bir nümunə olaraq, "Şahdəniz-2" layihəsi haqqında danışmaq mümkündür. Bu layihə Xəzər qazını ilk dəfə olaraq Avropa qaz bazarına çıxaracaq yeni Cənub Qaz Dəhlizinin başlanğıc nöqtəsidir. "Şahdəniz-2" üzrə yekun investisiya qərarı isə uğurların, qətiyyətli praqmatik siyasətin davamı olaraq dünya enerji siyasi palitrasında çox mühüm fundamental sənəd kimi xarakterizə oluna bilər. Çünki bu qərar dünyanın transenerji strukturunun ən mühüm komponenti kimi yanacağın şaxələndirilməsinə yeni üfüqlər açır. Azərbaycanın və xarici neft-qaz kampaniyalarının qətiyyəti və siyasi iradəsi nəticəsində regionun geosiyasi-iqtisadi xəritəsini dəyişən, enerji tarixinə qızıl hərflərlə yazılan ən mühüm hadisənin baş verməsi ilə yanacağın çoxşaxəli diversifikasiyasının ana arteriyası işə düşmüş olur.
Bir xüsusi məqamı diqqətdə saxlayaq ki, Türkiyə-Azərbaycan əlaqələri regional əməkdaşlıq üçün də başlıca şərtdir. Hazırda Qafqaz regionunda sabitliyin və təhlükəsizliyin möhkəmləndirilməsi, bütün iqtisadi və nəqliyyat əlaqələrinin bərpası, eləcə də region dövlətləri arasında münasibətlərin normallaşdırılması və uzunmüddətli sülhün təmin edilməsi istiqamətində ölkələrimizin birgə təşəbbüsləri bunun təcəssümüdür. Türkiyənin Azərbaycana verdiyi siyasi və mənəvi dəstək hər bir azərbaycanlını qürurlandırır, sevindirir.
Bir sözlə, Türkiyənin Azərbaycana verdiyi siyasi və mənəvi dəstək hər bir azərbaycanlını qürurlandırır, sevindirir. Bizim qardaşlığımız da, müttəfiqliyimiz də, birliyimiz də ƏBƏDİDİR!
Mətləb Salahov
