Azərbaycanda daha bir universitetin fəaliyyəti dayandırılacaq. Belə ki, 1999-cu ildə Ədliyyə Nazirliyində dövlət qeydiyyatına alınaraq ali təhsil müəssisəsi kimi fəaliyyətə başlamış Naxçıvan Universitetinin lisenziyası gələn ilin yanvar ayından dayandırılacaq. Mətbuatın yazdığına görə, buna səbəb Naxçıvan Təhsil Nazirliyinin universitetdə keçirdiyi yoxlama zamanı ciddi pozuntuların aşkarlanması olub. Artıq Naxçıvan Universitetinin bütün kollektivinə də fəaliyyətinin dayandırılması ilə bağlı xəbərdarlıqlar edilib.
Məsələ ilə bağlı açıqlama verən rektorun köməkçisi Vüqar Ələkbərov bildirib ki, bu barədə gedən söhbətlərdən onların da xəbəri var: "Universitetlə bağlanması ilə bağlı söz-söhbətlər var. Hələlik bu barədə bizə rəsmi heç bir məlumat verilməyib". Gəlin Naxçıvan Özəl Universiteti barədə daha geniş danışaq. Öncə qeyd edək ki, 1999-2019-cu illərdə universitetin rektoru təhsil ocağının yaradıcısı İsmayıl Əliyev olub. I. Əliyev Naxçıvanda olduqca dəyərli ziyalı, cəmiyyətin hörmətlə yanaşdığı alim sayılır. Gəncliyindən bəri Naxçıvan Dövlət Universitetində çalışan İ.Əliyev, bu elm ocağında ən yüksək vəzifələrə qədər yüksəlib. Sonradan bu ali məktəb İ.Əliyevin əlindən alınaraq, Naxçıvan Muxtar Respublikası Ali Məclisinin sabiq sədri Vasif Talıbovun qardaşı Məhərrəm Talıbovun nəzarətinə keçib. Əsl elm adamı olan İ.Əliyevin rəhbərliyi vaxtındakı yaradıcı Universitet sonradan yarıtmaz vəziyyətlə üz-üzə qalıb. Sürətlə nüfuzunu itirən bu universitetə bu ilin fevral ayında Anar Kazımov rektor təyin edilib. Daima elmi nailiyyətləri, böyük ziyalıları ilə seçilən Naxçıvanda son illər elmi müəsissələrin qeyri-ciddi, aidiyyatı olmayan şəxslərin əlinə keçməsi öz mənfi nəticələrini verməkdədir.
Keçmiş rəhbərlik zamanında yol verilən nöqsanlar artıq təhsil sahəsində də acınacaqlı durumu bərabərində gətirib. Xüsusilə V.Talıbovun idarəçilyi zamanı təhsil sahəsində yol verilən nöqsanlar, həttda cinayətə bərabər hüquq pozuntularu Naxçıvan təhsili üçün böyük bəlalara səbəb oldu.
Mətləb
