Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi, “Kimsəsiz Uşaqların Sosial Müdafiəsi” İctimai Birliyinin təşkilatçılığı ilə “Həyata pozitiv baxaq!” adlı layihə həyata keçirilir. Layihə çərçivəsində “Özünü sev! İntihar çıxış yolu deyil” Adlı kitab da çap olunub. Kitabda intihar məsələləri, intiharların baş vermə səbəbləri, intihar hadisəsi baş verməzdən əvvəl insanın özünəqapanma halları, depressiyaya düşməsi və digər problemlər həm tibbi, həm də elmi tərəfdən izah olunub. Layihə çərçivəsində yeniyetmə şagirdlər və gənclərlə intihar mövzusunda tədbirlərin keçilməsi və həmin tədbirlərdə çap olunan kitabın tədbir iştirakçılarına paylanması nəzərdə tutulub. Layihənin ilk tədbiri Bakının Binəqədi rayonundakı Rüstəm Əliyev adına 3 nömrəli tam orta məktəbdə keçirilib. Tədbirə yüz nəfərdən artıq iştirakçı qatılıb. Eyni zamanda cəmiyyət içində tanınan, söz sahibi olan təcrübəli qonaqlar da dəvət olunub. Əməkdar incəsənət xadimi Baba Vəziroğlu, “Bakı xəbər” qəzetinin baş redaktoru, siyasi şərhçi Aydın Quliyev, Əməkdar jurnalist, siyasi şərhçi Azər Həsrət tədbirin qonaqları arasında olub.
Birliyin sədri, layihə rəhbəri Lamiyə İsazadə açılış nitqində öncə layihənin donoru və mövzusu haqqında tədbir iştirakçılarına məlumat verib. Sonra o, layihə çərçivəsində çap olunan kitab haqqında danışıb. L.İsazadə şagirdlərə intiharın doğru seçim olmadığını, intihara qarşı necə mübarizə aparmaq lazım olduğunu izah edib, – deyə xəbərdə qeyd edilir. 3 nömrəli tam orta məktəbin direktoru, Əməkdar müəllim Almaz Həsrət çıxış edərək, gündəmin aktual problemlərindən birinin layihə şəklində həyata keçirilməsinə görə layihə rəhbərinə təşəkkürünü bildirib. Onun özü də mövzu ilə bağlı şagirdlərə dəyərli məsləhətlərini verib. Tədbirin həm qonağı, həm də moderatoru olan Azər Həsrət də intiharın yanlış addım olması haqqında yeniyetmələrlə maarifləndirici fikirlərini paylaşıb. Siyasi şərhçi Aydın Quliyev isə “şagirdlərlə belə ağrılı mövzunu paylaşdığı, müzakirə etdiyi üçün kədərləndiyini bildirib. O, şagirdlərlə hər zaman daha pozitiv mövzularda söhbət etmək, fikir mübadiləsi aparmaq istədiyini söyləyib. A.Quliyev intiharın çıxış yolu olmadığını və layihə çərçivəsində çap olunan kitab haqqında öz müsbət fikirlərini tədbir iştirakçıları ilə bölüşüb”.
Tədbirdə iştirak edən ictimai xadim, şair Baba Vəziroğlu öz çıxışına “Ali Baş Komandan” şeiri ilə başlayıb. O, Azərbaycanın ərazi bütövlüyünü tam bərpa etməyə çalışan və bunu bacaran cənab Prezidentə öz təşəkkürünü bildirmək üçün ona həsr etdiyi şeiri səsləndirib. Bundan sonra isə o, mövzu haqqında öz fikirlərini şagirdlərlə bölüşüb. Tədbirin sonunda “Özünü sev!” kitabı iştirakçılara paylanılıb, şagirdlərin ifasında şeir və mahnılar səsləndirilməklə pozitiv sonluq təmin edilib.
