Mayın 15-də Prezident İlham Əliyevin iştirakı ilə Qəbələ Dəmir Yolu Vağzalının və Ləki stansiyası-Qəbələ birxətli dəmir yolunun açılışı olub. Hazır vəziyyətə gətirilən Ləki stansiyası–Qəbələ birxətli dəmir yolunun tikinti işlərinə 2018-ci ildə başlanıb. Dəmiryolu xəttinin uzunluğu ox üzrə 42,3 kilometr, yan yollarla birlikdə isə 44,5 kilometrdir.
Ümumilikdə, layihə üzrə 122 süni mühəndis qurğusunun, Ağdaş dəmir yolu dayanacağının, Qəbələ Dəmir Yolu Vağzalının və stansiyasının, Qəbələ dartı yarımstansiyasının tikintisi, həmçinin Hacıalı yarımstansiyasının təmiri işləri yerinə yetirilib. Təbii ki, ən müasir yol-nəqliyyat infrastrukturu, ilk növbədə vətəndaşların rahatlığına xidmət edəcək. Bu layihənin reallaşması Qəbələdən paytaxta və digər yerlərə gedən sakinlərin rahat və təhlükəsiz şəkildə mənzil başına çatmasına hərtərəfli imkan yaradır.
Məsələyə münasibət bildirən deputat, iqtisadçı-ekspert Vüqar Bayramov qeyd edir ki, Ləki stansiyası-Qəbələ birxətli dəmir yolununun istifadəyə verilməsi paytaxtdan Qəbələyə dəmiryolu vasitəsilə səfər etməyə imkan yaradacaq. O hesab edir ki, bu dəmir yolunun istifadəyə verilməsi daxili və gəlmə turizmin inkişafı baxımdan vacibdir: “Qəbələ turistlərin ən çox səfər etdiyi rayonlarımızdandır. Turizmin inkişafı Qəbələ rayonunun iqtisadi göstəricələrinə də təsirsiz ötüşməyib. Rayonda yerləşən otellərdə rəsmi qeydiyyatdan keçməklə qalanların sayı son 5 ildə 31 dəfə artıb. 2015-ci ildə sözügedən rayonda 5 909 nəfər otellərdə qalmışdısa, pandemiyadan əvvəlki il bu rəqəm 186 431-dək yüksəlib. Həmin müddətdə hotellərin gəliri 393 min manatdan 30 milyon 919 min manatadək artıb. Otellərdə nömrələrin sayı son 5 ildə 196-dan 1 127-ə çatıb. Bu da birbaşa turizm sektorunda tələbin artması ilə bağlı olub. Turizmin inkişafı yan sahələrə də təsir edib. Belə ki, Qəbələdə son 5 ildə pərakəndə ticarət dövriyyəsi 32 % artaraq 197 milyon manata çatıb. Həmin müddətdə ictimai iaşənin dövriyyəsi 7 milyon 554 min manatdan 14 milyon 774 min manatadək yüksəlib. Yeni dəmir yolu xəttinin istifadəyə verilməsi Qəbələyə səfər edən turistlərin sayının artmasına gətirib çıxaracaq. Əcnəbi turistlərin qatarla səfərlərə üstünlük verdiyini nəzərə alsaq, bu, gəlmə turizmin inkişafına da xüsusi töhfə verəcək”. Onun sözlərinə görə, Bakıdan Qəbələyə gedən dəmir yolu xəttində İsveçrənin “Stadler” şirkətinin istehsalı olan “Kiss” markalı elektrik qatarlarından istifadə olunacaq: "Yolda orta sürətin saatda 100 km olması nəzərdə tutulur ki, bu da Bakıdan gedən sərnişinlərin 3 saat sonra Qəbələyə təhlükəsiz və rahat şəraitdə çatmasını təmin etmiş olacaq".
Digər ekspertlər də bildirir ki, ölkəmizdə qatar turizminin inkişaf etdirilməsinə böyük ehtiyac var. Bu, büdcəli bir turizm növüdür və onu Azərbaycan üçün çox aktual turizm növlərindən biri hesab etmək olar. Dünya təcrübəsi göstərir ki, dəmir yolu nəqliyyat vasitəsi turistlər üçün çox cəlbedicidir, çünki digərlərinə nisbətən daha təhlükəsiz hesab olunur. Həmçinin, getdikləri yerə daha rahat çatma baxımından nəqliyyatın bu növü turistlər üçün daha sərfəlidir. Bu gün Qəbələ Bakıdan sonra Azərbaycanda ikinci turizm mərkəzidir. Bu mənada, dəmir yolunun Qəbələyə çatdırılması turistlərin bura axınını daha da sürətləndirəcək. Növbəti illərdə Şahdağ xizək kurortuna da dəmir yolunun çəkilişini təmin etmək nəzərdə tutulur.
Qəbələdən sonra Quba və Qusar infrastruktur baxımından turistlərin üz tutduğu yerlər sırada ön sıralarda dayanır. Yəni bu regionlar turistlər arasında prioritet sırada dayanır. İndi Qəbələ və daha sonra Qusara dəmir yolu xətlərinin çəkilməsi ora gedən yolun məsafəsinin və səfər müddətinin azalmasına gətirib çıxarmaqla yanaşı, bölgələrin turizm imkanlarını genişləndirəcək, iqtisadi inkişafını sürətləndirəcək. O da məlumdur ki, bu gün Azərbaycan dövləti işğaldan azad edilmiş ərazilərdə intensiv şəkildə bərpa-quruculuq işləri həyata keçirməkdədir. Bu fonda cari ilin fevral ayının 14-də Prezident İlham Əliyev tərəfindən təməli qoyulan Horadiz-Ağbənd dəmir yolunun çəkilişi Azərbaycan üçün tarixi əhəmiyyət kəsb edən bir layihənin başlanğıcı kimi qiymətləndirilməlidir. Ümumi uzunluğu 100 kilometr olan bu dəmir yolu xəttinin strateji əhəmiyyəti olduqca böyükdür. Çünki bu nəqliyyat infrastrukturu Azərbaycan vətəndaşlarının azad olunmuş torpaqlara gediş-gəlişinin təminatında əhəmiyyətli rol oynayacaq və ən əsası da, bu xətt Azərbaycanın əsas hissəsi ilə Naxçıvan Muxtar Respublikası arasında birbaşa dəmir yolu nəqliyyat əlaqəsinin yaranmasına böyük töhfə verəcək. Beləliklə, Naxçıvanla Azərbaycanın qərb rayonlarını birləşdirən yeni nəqliyyat kommunikasiyalarının inşası təmin ediləcək. Beləliklə, bir müddət sonra bizi birbaşa Naxçıvana aparan dəmir yolu xəttinin açılışı reallaşacaq. Bu isə, qeyd edilən istiqamətdə də qatar turizminin inkişafına əlavə mühüm töhfələr verəcək.
Samirə SƏFƏROVA
