Prezident İlham Əliyev Oqtay Kazım oğlu Şirəliyevin Azərbaycan Respublikasının səhiyyə naziri vəzifəsindən azad edilməsilə bağlı sərəncam imzalayıb. Qeyd edək ki, o, 2005-ci ilin oktyabr ayından Azərbaycanın səhiyyə naziri idi. Ölkə başçısının digər sərəncamı ilə Teymur Musayev səhiyyə nazirinin birinci müavini vəzifəsinə təyin edilib və səhiyyə naziri vəzifəsinin müvəqqəti icrası ona tapşırılıb. T.Musayev 1987-94-cü illərdə ATU-da tibb təhsili alıb. O, 2003-2004-cü illərdə Strasburq Universitetində Laparoskopik cərrahiyyə ixtisası üzrə biliyini artırıb. 2013-15-ci illərdə isə RISEBA və Riga Stradins Universitetində təhsilini magistr səviyyəsində davam etdirib. T.Musayev bu təyinatadək Səhiyyə Nazirliyində Səhiyyənin təşkili şöbəsinin müdiri vəzifəsində çalışırdı. Nazirlər Kabineti yanında Operativ Qərargahın brifinqində çıxış edib.
Xatırladaq ki, Azərbaycanda səhiyyənin fəaliyyətinin qənaətbəxş olmaması ilə bağlı məsələ daim gündəmdə olub. Bütün bu narazılıqların fonunda daima Oqtay Şirəliyevin yarıtmaz fəaliyyəti tənqid edilirdi və onun istefası tələb olunurdu.
Oqtay Şirəliyevin vəzifədən azad edilməsi səhiyyə sistemində baş verən həbslərin fonunda reallaşdı. İki gün əvvəl Fövqəladə Hallar Nazirliyinin Tibb Mərkəzinin Modul Tipli Hospitalının baş həkiminin qanunsuz əməlləri ifşa edildi. Baş Prokurorluğun bu barədə məlumatında bildirilirdi ki, ölkəmizdə koronavirus xəstəliyinin geniş yayıldığı dövrdə əhalinin pandemiyaya qarşı mübarizə istiqamətində həyata keçirilən müfəssəl dövlət siyasətinə və bu sahədə mövcud olan qanunvericiliyə zidd olaraq öz qanunsuz əməlləri ilə əhalinin sağlamlığını təhdid altına alan vəzifəli şəxslərə, habelə onların yaratdıqları korrupsiya şəbəkələrinə qarşı prokurorluq orqanları tərəfindən təxirəsalınmaz hüquqi tədbirlərin görülməsi davam etdirilir. Belə ki, Baş prokuror yanında Korrupsiyaya qarşı Mübarizə Baş İdarəsinə daxil olmuş məlumat əsasında həyata keçirilmiş əməliyyat-istintaq tədbirləri ilə Fövqəladə Hallar Nazirliyinin Tibb Mərkəzinin Modul Tipli Hospitalının baş həkimi Ağayev İmran Əli Ağa oğlunun qeyri-rəsmi olaraq köməkçiləri olan həmin müəssisənin qeydiyyatçıları Orucov Qulu İlqar oğlu və İmanlı Taleh Mövlamverdi oğlu həbs edilib. Bu istiqamətdə həbslər əyalətlərdə də davam edib. Sabirabad rayonu, Suqovuşan kənd sakininin koronavirus infeksiyasına (COVID-19) yoluxmaqla stasionar şəraitdə müalicəyə ehtiyacı olan qohumunun Rayon Mərkəzi Xəstəxanasının Fazil adlı həkimi tərəfindən xəstəxanaya yerləşdirilməsi müqabilində 1000 ABŞ dolları məbləğində pul alması barədə Sabirabad Rayon Prokurorluğuna müraciəti daxil olub. Aparılmış araşdırmalarla müəyyən edilib ki, Sabirabad Rayon Mərkəzi Xəstəxanasının İnfeksion xəstəliklər şöbəsinin müdiri, koronavirus xəstələrinin müayinə və müalicəsi üzrə koordinator həkim Əliyev Fazil Məhərrəm oğlu koronavirus infeksiyasına (COVID-19) yoluxmuş şəxsin qohumundan qeyd edilən xəstəxanaya yerləşdirilərək müalicə olunması üçün 1000 ABŞ dolları məbləğində pul vəsaitini rüşvət qismində alıb, sonradan isə həmin xəstə müalicə olunduğu xəstəxanada vəfat edib. Toplanmış material üzrə fakta görə Cinayət Məcəlləsinin 311.3.2-ci (rüşvət alma) maddəsi ilə cinayət işi başlanıb, Fazil Əliyev 23 aprel 2021-ci il tarixdə həmin maddədə nəzərdə tutulan cinayət əməlini törətməkdə şübhəli şəxs qismində tutulub.
Azərbaycan hakimiyyətinin dünyanı bürüyən pandemiya ilə bağlı bütün resursları ilə mübarizə apardığı bir zamanda həmin sahəyə bilavasitə cavabdeh olan qurumda bu cür halların yaşanması xəyanətə bərabər addım sayıla bilər. Səhiyyədə ciddi nöqsanların baş verməsi Oqtay Şirəliyevin xeyli müddət vəzifəsinin öhdəsindən gələ bilməməsilə bağlı müzakirələri aktual etmişdi. Bakının Xətai rayonu ərazisində yerləşən Respublika Narkoloji Mərkəzində baş verən yanğın hadisəsi zamanı palatada olan 25 xəstənin faciəvi şəkildə yanaraq həlak olması ölkə səhiyyəsinin acınacaqlı durumda olduğunu ortaya qoydu.
2018-ci ildə Oqtay Şirəliyev üçün xoş olmayan digər hadisə isə iyul ayının 4-də ölkənin enerji sistemində yaranmış vəziyyətlə əlaqədar Prezident İlham Əliyevin yanında keçirilən müşavirədə baş verdi. Xatırladaq ki, həmin müşavirədə iştirak edən Oqtay Şirəliyev dövlət başçısına etdiyi məruzədə ölkənin bütün xəstəxanalarında generator sistemlərinin quraşdırıldığını və işlədiyini bildirdi. Ancaq nazirin bu çıxışı Prezident İlham Əliyevin diqqətindən yayınmadı və ölkə başçısı yekun çıxışında Səhiyyə nazirinin bütün xəstəxanalarda generatorların olması və işləməsi barədə fikirlərinin həqiqət olmadığını vurğuladı. Dövlət başçısı, eyni zamanda, çıxışı zamanı Səhiyyə Nazirliyində təftiş aparılmasını və nəticə barədə ona məruzə olunmasını da vurğulamışdı. Qeyd edilir ki, məhz dövlət başçısının bu tapşırığından sonra Səhiyyə Nazirliyi sistemində aparılan təftişin nəticəsində ciddi yeyinti faktlarının olması aşkarlandı. Bütün bunlara rəğmən, Oqtay Şirəliyevə yenə də özünü doğrultmaq üçün şans verildi. Ancaq o, son COVİD “imtahanından” da qeyri-kafi qiymət alaraq, vəzifəsilə vidalaşmalı oldu. Ümid edək ki, səhiyyə sahəsinə bundan sonra rəhbərlik edəcək şəxslər bu acı hallardan doğru nəticə çıxararaq, onlara tapşırılan işin öhdəsindən layiqincə gəlməyi baracaq.
Məhəmmədəli QƏRİBLİ
