İlk dəfə Çinin Uhan şəhərində ortaya çıxan və çox sayda insanın ölümünə səbəb olan koronavirus (2019-nCoV) qısa müddət ərzində dünyanın bir çox ölkəsində görünməyə başlayıb.
Baki-xeber.com xəbər verir ki, son olaraq İngiltərə və Rusiyada koronavirus aşkarlanıb. İngiltərədə eyni ailədən olan 2 nəfərdə 2 növ koronavirus aşkarlandığı bildirir. Sonda, Rusiya da ilk dəfə iki nəfərin koronavirusa yoluxduğunu açıqlayıb.
İtaliya Nazirlər Kabineti isə koronavirusa görə 6 ay müddətinə fövqəladə vəziyyət elan edib. Bununla bağlı qərar Dünya Səhiyyə Təşkilatının (DST) yanvarın 30-da yeni növ koronavirusla bağlı qlobal fövqəladə vəziyyət elan etməsi və İtaliyada iki çinli turistdə təhlükəli virus aşkarlanmasından sonra verilib. Çində ortaya çıxan virusdan qaynaqlanan qorxu və çaxnaşma İtaliyada çinlilərə qarşı irqçi hücumlara çevrilməyə başlayıb.
Çin prezidenti Şi Cinpinq isə Xalq Qurtuluş Ordusunun koronavirusla mübarizəyə qoşulmasına dair göstəriş verib. Prezident ordunun virusun əsas mənbəyi sayılan Uhan şəhərində tikilən xəstəxanada xidmət edəcəklərini deyib.
Virus ilk dəfə keçən il dekabrın 12-də Çinin Hubey əyalətinin 11 milyon insanın yaşadığı Uhan şəhərində aşkar edilib. Uhan Bələdiyyəsi sağlamlıq komissiyası 31 dekabr 2019-cu il tarixində şəhərdəki Huanan dəniz bazarı ilə təmasda olan 27 nəfərdə "naməlum" xəstəliyin aşkarlandığını bildirərək, bazarı bağladığını elan edib. Virusun da məhz sözügedən bazarda satılan 2 növ ilandan yayıldığı bildirilir.
Çinin Hong Kong və Makaoda bölgələrində də virus aşkarlanıb. Qısa müddət sonra, bölgə ölkələri, Tailand, Cənubi Koreya, Yaponiya, Sinqapur, Malayziya, Filippin, Vyetnam, Kamboca, Nepal, Hindistan, Şri Lankada da virus daşıyıcısı insanların olduğunu təsdiqlənib.
İlk dəfə Uhan şəhərində görüldüyü üçün "Uhan virusu" adı verilən koronavirusun yeni növü, ABŞ, Kanada, Rusiya, İngiltərə, Fransa, Almaniya, İtaliya, Avstraliya, Birləşmiş Ərəb Əmirlikləri və Finlandiyaya da, əsasən Çindən bu ölkələrə gedən insanlar vasitəsilə yayılıb.
Çində yeni bir növ koronavirus epidemiyası səbəbindən ölənlərin sayı 200-ü keçib, virusa yoluxan insanların sayı isə 10 minə çatıb, 600-yə yaxın insanın vəziyyətinin ağır olduğu deyilir.
Virus Uhandan digər şəhərlərə və əyalətlərə sürətlə yayıldığı üçün, yanvarın 22-dən etibarən Hubey əyalətinin 17 böyük və kiçik şəhərində, xüsusən Uhanda ictimai nəqliyyat dayandırılıb.
Fransanın Pasteur İnstitutunun alimləri Çindən dünyaya yayılmağa başlayan yeni koronavirus növünün müalicəsində istifadə üçün peyvənd hazırlamağa çalışdıqlarını açıqlayıblar. İnstitut rəsmisi Kristofer D'Enfert jurnalistlərə açıqlamasında peyvəndin 20 ay ərzində istifadə edilə biləcəyini söyləyib.
Çin Milli Səhiyyə Komissiyası ölkədə yeni bir növ koronavirus xəstəliyinə yoluxan, sonradan sağalmış insanların yenidən virusa yoluxa biləcəyi ilə bağlı xəbərdarlıq edib.
Ölkədə koronavirusa qarşı istifadə edilən tibbi maska və temperaturu aşağı salan dərman ehtiyatları da tükənməyə başlayıb. Xiaogan şəhərində bir xəstə pulunu ödəməsinə baxmayaraq, 4 gün ərzində temperaturu aşağı salan dərmanlar ala bilməyib. Xəstəxana, dərman qalmadığını və tapılmadığını ifadə edərək xəstənin pulunu geri qaytarıb.
