Liviyadakı tərəflər atəşkəslə əlaqədar Moskvada Türkiyə və Rusiyanın vasitəçiliyilə bir araya gəlib. Atəşkəslə bağlı ilkin anlaşma mətni də hazırlanıb. Baki-xeber.com xarici mediaya istinadən xəbər verir ki, Rusiya xarici işlər naziri Sergey Lavrov və Türkiyə xarici işlər naziri Mevlut Çavuşoğlu Milli Birlik Hökumətinin rəhbəri Fayez Saracın mətni imzaladığını, Haftarın yanvarın 15-nə qədər vaxt istədiyini açıqlayıb.
Ancaq Rusiya dövlət agentliyi TASS “Əl Arabiya” televiziyasına istinadən xəbər verir ki, yanvarın 13-də Moskvada aparılan danışıqların sonunda Rusiya və Türkiyədən atəşkəs razılaşmasını imzalayıb-imzalamamaq üçün vaxt istəyən üsyançı general Haftar razılaşma mətnini imzalamadan Moskvadan ayrılıb.
Rusiya Xarici İşlər Nazirliyi də “Əl Arabiya”nın xəbərini təsdiqləyib: "Razılaşma əldə etmək üçün Liviyadakı münaqişə tərəflərilə işimizi davam etdiririk. Haftar razılaşmanı imzalamadı və Moskvadan ayrıldı".
Rusiya Müdafiə Nazirliyi isə Haftarın Milli Birlik Hökuməti ilə razılaşmaya müsbət baxdığını və yerli məsləhətləşmələr üçün 2 günə ehtiyac olduğunu bldirib.
Türkiyə mediası yazır ki, Moskvanı gecə ilə tərk edən üsyançı general Haftar razılaşmanı imzalamamasının səbəbi kimi Liviya Milli Ordusunun bir çox tələbinin yerinə yetirilmədiyini göstərib. Liviyalı general ordusunun Tripoliyə daxil olmasına icazə verilməsini, Milli Birlik Hökuməti qurulub özünün yaratdığı Tobrukdakı parlamentdən legitimlik almasını, atəşkəsdə Ankaranın iştirakının olmamasını və Türkiyənin əsgərlərini ölkədən çəkərək MBH ilə imzaladığı müqavilələri ləğv etməsini tələb edib.
Məsələ ilə bağlı açıqlama verən Türkiyə prezidenti Rəcəb Tayyib Ərdoğan bundan sonrasının Putinin üzərində olduğunu deyib: “Atəşkəsi yazılı hala salmaq üçün Moskvadakı görüşlərdə Tripoli hökuməti barışcıl mövqeyi nümayiş etdirdi. Bu münasibətə baxmayaraq, çevrilişçi Haftar barışığa imza atmaqdan imtina etdi. Əvvəlcə "bəli" dedi, sonra təəssüf ki, Moskvadan ayrıldı, Moskvadan qaçdı və imzalanmadı. Ancaq heyətimiz orada dürüst mövqe nümayiş etdirərək sənədi imzaladı və indi hər şey bizim əlimizdədir. Biz öz vəzifəmizi yerinə yetirdik, bundan sonrası cənab Putin və onun komandasına aiddir...”
Moskvadakı nəticəsiz müzakirələrdən bir gün sonra isə Liviya Milli Birlik Hökuməti Haftara aid qüvvələrin hücumlarını davam etdirmək üçün Tripolinin cənubuna toplaşdığını bəyan edib. Hərbi mənbələr BƏƏ-nin zirehli texnikaları və artilleriya qurğularının Haftara bağlı silahlıların əsas qərargahı Terhuneya gəldiyini bildirib.
