İran Islam İnqilabı Keşikçiləri Korpusunun (SEPAH) ABŞ-ın İraqdakı hərbi bazalarına raket zərbələri nəticəsində 80 ABŞ əsgəri ölüb.
Baki-xeber.com xəbər verir ki, bu barədə İran dövlət televiziyası məlumat yayıb.
Televiziyanın məlumatına görə, atılan 15 raketin hamısı ABŞ-ın hədəflərinə dəyib, bazalardakı helikopterlər və hərbi texnikaya ciddi ziyan dəyib.
Televiziya ABŞ-dan gələ biləcək mümkün cavab hücumlarına qarşı İranın müəyyənləşdirdiyi digər 100 hədəfin də vurulacağını bildirib. Dövlət televiziyası ABŞ bazalarının İraq sərhədi yaxınlığındakı Kermanşah şəhərindən atılan bərk yanacaqlı “Fatih” raketləri ilə vurulduğunu deyib.
ABŞ-ın bir hərbi rəsmisi isə CNN İnternational-a bildirib ki, hərbçilərin hücumlardan əvvəl xəbərdar edilmələri üçün kifayət qədər vaxt olub. O əlavə edib ki, bazalarda olan əsgərlərin sığınacaqlara getməsi üçün kifayət qədər vaxt olub.
Bəzi mənbələr isə İraqın Ayn əl-Əsəd aviabazasında ümumiyyətlə amerikalıların olmadığını iddia edib.
İran İslam İnqilabı Keşikçiləri Korpusu Ayn əl-Əsəd aviabazası ilə yanaşı İraqın Anbar və Ərbil şəhərlərindəki ABŞ qoşunlarının da olduğu aviabazalara da ballistik raketlərlə zərbələr endirib.
ABŞ Prezidenti Donald Tramp İranın Amerikanın İraqda yerləşən “Əl-Əsəd” hərbi bazasını bombalaması ilə bağlı ilkin bəyanat verib.
Tramp öz “Twitter” səhifəsində bildirib ki, hazırda tələfat və zərərin qiymətləndirilməsi aparılır: “İran tərəfi İraqda yerləşən iki hərbi bazaya raketlərlə atəş açıb. Hazırda tələfat və zərərin qiymətləndirilməsi aparılır. Hələ ki, hər şey yaxşıdır. Biz dünyanın hər yerində ən güclü və yaxşı təchiz olunmuş orduya malikik”.
ABŞ lideri qeyd edib ki, məsələ ilə bağlı daha geniş bəyanat verəcək.
İran Prezidenti Həsən Ruhani hökumətin iclasında deyib ki, ABŞ-ın məqsədlərindən biri həm İranın daxilində, həm də regional səviyyədə qorxu salmaqdır: “Onların hədəfi İranla İraqın arasını vurmaq və regionun terrorçulardn azad olunmasının qarşısını almaqdır. Xoşbəxtlikdən, bütün məqsədlər uğursuzluğa düçar olub”.
İclas zamanı çıxış edən Xarici İşlər naziri Məhəmməd Cavad Zərif İranın ABŞ-la danışıqlar aparmaq niyyətində olmadığını deyib.
Nazir bildirib ki, İranın cavab zərbəsinin yeganə məqsədi ABŞ-ı regiondan çıxarmaqdır.
O əlavə edib ki, zərbə iranlı general Qasım Süleymani öldürüldüyü zaman istifadə olunan dronun buraxıldığı bazaya endirilib.
SEPAH-ın İraqda ABŞ hərbi bazasına “Şəhid Süleymani” adlı əməliyyatından sonra İran İslam İnqilabı Keşikçilər Korpusu bəyanat verib. İran ordusu qeyd edir ki, bu hücum ABŞ-ın iranlı generalın ölümü ilə əlaqədar hərəkətinə cavab olaraq keçirilib.
Ordu bəyan edir ki, Tehran öz qətiyyətli mövqeyini, ABŞ hərbçilərinin regiondan çıxarılması ilə bağlı strategiyanı son addıma qədər icra edəcək.
Yaxın Şərq regionunda böhran Avropa İttifaqına da təsir göstərir, Avropa Komissiyası güc tətbiq olunmasını dayandırmağa çağırır. Avropa Komissiyasının rəhbəri Ursula fon der Lyayen Komissiyanın xüsusi iclasında belə deyib.
İclas zamanı Yaxın Şərqdə, xüsusilə İraq, İran və Liviyada baş verən hadisələr və bölgədə yaranmış vəziyyət müzakirə olunub:“Mövcud böhran təkcə regiona yox, bizim hamımıza təsir göstərir. Silahdan istifadə olunması dərhal dayandırılmalı, dialoqa yer verilməlidir”.
Namiq QULİYEV
