Demokrat senator Tim Keyn Amerika Senatının müzakirəsinə verdiyi qətnamədə Prezident Donald Trampın İrana qarşı Konqresin razılığı olmadan hərbi əməliyyatlar aparmasının qanunla qadağan olunmasını təklif edib.
Qətnamə ABŞ-ın İran generalı Qasım Süleymani əməliyyatı nəticəsində İraqdakı qətllər fonunda verilib.
Əslində ABŞ Konqresi müharibə elan etmək və hərbi əməliyyatların aparılması üçün prezidentə icazə vermək hüququna malikdir. Bununla belə, de-fakto icraedici orqan xaricdə hərbi əməliyyatların geniş spektrini həyata keçirir, bunu isə Konqresin keçmiş qərarları və ABŞ vətəndaşlarını müdafiə etmək zərurəti ilə əsaslandırır.
"ABŞ Silahlı Qüvvələrinin İranla silahlı münaqişədə iştirak etməli olub-olmaması məsələsi Konqresin və publikanın bu münaqişədə nə dərəcədə məlumatlandırılmasından, Konqresdə açıq müzakirələrdən və konstitusiyada nəzərdə tutulduğu kimi, konqresdə səsvermədən sonra həll edilə bilər", - deyə qətnamədə bildirilir.
Tramp isə İrana qarşı bundan sonra da fəaliyyətə hazır olduğunu bəyan edib. Sözügedən qətnamə Konqresin icazəsi olmadan Trampa İrana qarşı 30 gün ərzində istənilən "düşmənçilik hərəkətlərini" qadağan etməyi nəzərdə tutur.
Məsələ burasındadır ki, Demokratlar Suleymaninin qətlinin Tehranla münaqişənin qızışmasına səbəb ola biləcəyindən hiddətlənib. Onlar, həmçinin, Ağ Evin əvvəlcədən əməliyyatın aparılacağı barədə onlara məlumat verməməsindən narazıdır. Respublikaçılar isə Trampın hərəkətlərini dəstəkləyib. ABŞ prezidentinin partiyadaşlarının Senatda çoxluq təşkil etdiyini nəzərə alsaq, Keynin qətnaməsi səsvermədə iflasa məhkumdur. Lakin prosedur incəlikləri nəticəsində respublikaçıların on gün ərzində qətnamənin müzakirəyə çıxarılmasına yol verməmək imkanı yoxdur.
Xatırladaq ki, cümə axşamı Pentaqon ABŞ-ın İraqda İran generalı Qasım Süleymaninin öldürülməsi ilə bağlı əməliyyat keçirdiyini təsdiqləyib. Həlak olanlar arasında İraqda şiə milis Komandanının müavini Əbu Məhdi əl-Muxandis də olub.
İranın ali dini lideri Əli Xamneyi Süleymaninin ölümünə görə qisas alacağını bildirib. Lakin yerli KİV hazırda onun özünün həyatı üçün ciddi əndişə keçirdiyini yazır. Belə bir iddia ilə Yaxın Şərq üzrə ixtisaslaşmış hərbi jurnalist və bloqer Babak Taqvey özünün tvitter hesabında çıxış edib.
Bu arada Qasım Süleymaninin varisi, İslam İnqilabı Keşikçiləri Korpusunun (SEPAH) "əl-Qüds" bölməsinin yeni rəhbəri İsmayıl Kaani Yaxın Şərqdə ABŞ vətəndaşlarını öldürəcəyini vəd edib. Əl-Cəzirə telekanalı bu barədə onun özünün tvitter hesabında paylaşım etdiyini xəbər verib. Xəbərə görə, Kaani "Bir az səbr edin, siz bütün Yaxın Şərqdə amerikalıların cəsədlərini görəcəksiniz", — deyə bildirib.
Qeyd edək ki, İsmail Kaani 1997-ci ildən İslam İnqilabı Keşikçiləri Korpusunun (İİKK) "əl-Qüds" Xüsusi Qüvvələrinin mərhum generalı Qasım Süleymaninin müavini olub. Yanvarın 3-də isə onun həm də Süleymaninin varisi olduğu bəlli olub.
SAMİRƏ
