İran İslam İnqilabı Keşikçiləri Korpusuna (SEPAH) bağlı Qüds qüvvələrinin komandiri Qasim Süleymani ABŞ torpaqlarında böyük bir hücum planı hazırlayırdı.
Baki-xeber.com xəbər verir ki, bu iddianı ABŞ Baş Qərargah rəisi Mark Milley səsləndirib.
Baş Qərargah rəisi Süleymaninin son zamanlarda ABŞ torpaqlarında böyük bir hücum planı hazırladığına dair əllərində güclü kəşfiyyat məlumatlarının olduğunu deyib.
Qeyd edək ki, Qasim Süleymani və şiə qrupu Haşdi Şabi liderlərindən olan Əbu Mehdi əl-Mühəndisi Bağdad Beynəlxalq Aeroportu yaxınlığında ABŞ-ın raket zərbələri nəticəsində öldürülüb. Öldürülən 10 nəfər arasında Süleymaninin kürəkəni Məhəmməd Rza Cabiri də var.
22 ildir İranın Orta Şərqdəki bütün əmliyyatlarını idarə edən Qüds qüvvələrinin komandiri Qasim Süleymaninin təyyarəsi Dəməşqdən Bağdada gəlib. Əbu Mehdi əl-Mühəndisi də Bağdad Beynəlxalq Aeroportuna Süleymanini qarşılamaq üçün gedib və hücumun da karqo terminalında, iranlı generalın qarşılandığı yerdə baş verib. Adlarının açıqlanmasını istəməyən rəsmilər Süleymaninin cəsədinin tanınmaz halda olduğunu, onun kimliyinin barmağındakı üzüklə müəyyən edildiyini söyləyiblər.
ABŞ Süleymanini vuran raketlərin pilotsuz təyyarələrdən atıldığını bildirir. ABŞ mediası iranlı generalın olduğu avtomobili yox edən raketlər MQ-9 Reaper tipli pilotsuz uçuş aparatından atıldığını yazır. MQ-9 Reaper ABŞ Hərbi Hava Qüvvələrinin ən yeni pilotsuz uçuş aparatlarından biridir. İran dövlət televiziyası isə hücumun ABŞ helikopterləri tərəfindən gerçəkləşdirildiyini bildirir.
Zərbələrin İranı gələcək hücum planlarından çəkindirmək məqsədi daşıdığını bildirən Pentaqon İranın Yaxın Şərqdəki ən qorxulu adamı Süleymaninin öldürülməsi əmrini birbaşa prezident Trampın verdiyini açıqlayıb.
