ABŞ Prezidenti Donald Tramp dünyanın ən böyük adası olan, Danimarkanın muxtar ərazisi hesab edilən Qrenlandiyanı almaq istəyir. Baki-xeber.com xəbər verir ki, bu barədə "Wall Street Journal" nəşri məlumat yayıb.
Tramp Qrenlandiyanı almaq fikrinə, yaz aylarında bir yeməkdə qonaqlardan birinin, Danimarkanın adaya hər il yatırdığı 500 milyon dolları tapmaqda çətinlik çəkdiyini dedikdən sonra düşüb. Bundan sonra Tramp müşavirlərinə məsələni araşdırmağı tapşırdığı iddia edilir.
Daha sonra məsələni yenidən gündəmə gətirən Trampın diqqətini, 55.000 insanın yaşadığı adanın təbii qaynaqları və geosiyasi əhəmiyyəti cəlb etdiyi deyilir.
Vəziyyətlə tanış iki mənbənin “Reyters” agentliyinə bildirdiyinə görə, məsələ bəzi müşavirlər tərəfindən zarafat kimi qəbul edilsə də, Ağ Evin bəzi başqa müşavirləri buna ciddi yanaşıb. Nəşrə görə, müşavirlərdən bəziləri Trampa bu məsələdə dəstək verib və ABŞ prezidentinin, 1867-ci ildə Rusiyadan Alyaskanın 7.2 milyon dollara satın alınması kimi bir siyasi miras qoya biləcəyini bildirib. 1.5 milyon kvadrat kilometrdən çox ərazisi olan Alyaskaya ödənilən pulun hazırkı dəyərinin 2018-ci il rəqəmlərinə görə 108 milyon dollar olduğu deyilir.
Trampın istəyi Danimarka siyasətçiləri tərəfindən tənqidlə qarşılanıb. Hətta onlar arasında Trampın bu niyyətini aprel zarafatı adlandıranlar da olub. ABŞ-ın keçmiş Danimarka səfiri isə prezidentin istəyini fəlakət adlandırıb.
Qrenlandiya isə Trampın bu planına cavabı olaraq bildirib ki, “biz satılmırıq”. Qrenlandiyanın Xarici İşlər Nazirliyi bəyanatında adanın satış üçün yox, biznes əməkdaşlığına açıq olduğunu deyib.
“Qrenlandiya minerallar, tərtəmiz su və buz, balıq ehtiyatları, dəniz məhsulları, bərpa olunan enerji kimi qiymətli resurslarla zəngindir və turizmin inkişafı üçün yeni bir vasitədir. Biznes əməkdaşlığı üçün açığıq, satışa yox”, - Qrenlandiya XİN-in açıqlamasında deyilir.
Qeyd edək ki, keçmiş ABŞ prezidenti Harri Trumen, 1946-cı ildə 2,160 milyon kvadrat kilometr ərazisi ilə dünyanın ən böyük adası olan, 81 faizi buzlarla örtülü Qrenlandiyanı 100 milyon dollara almaq istəyib, ancaq Danimarka Harrinin bu təklifini rədd edib.
Danimarkanın özünü idarə edən muxtar ərazisi olan Qrenlandiya Atlantik və Şimal Buzlu okeanlar arasında yerləşir. Adanın iqtisadiyyatı Danimarka iqtisadiyyatdan asılıdır. Qrenlandiya öz daxili siyasətini idarə edir, Kopenhagen isə müdafiə və xarici siyasət məsələləri ilə məşğul olur.
