Rusiya Xarici İşlər Nazirliyi SSRİ dövründə ABŞ-la imzalanmış "Yaxın və orta mənzilli raketlərin ləğvi" haqqında sazişin (İNF) rəsmən ləğv edildiyini açıqlayıb. ABŞ dövlət katibi Mayk Pompeo isə ABŞ-ın Rusiyaya verdiyi vaxtın bitdiyini və ölkəsinin razılaşmadan çəkildiyini bəyan edib. NATO da razılaşmanın bitdiyini və məsuliyyətin Rusiyanın üzərində qaldığını bildirib.
Baki-xeber.com xarici mediaya istinadən xəbər verir ki, "Yaxın və orta mənzilli raketlərin ləğvi" haqqında saziş 8 dekabr 1987-ci ildə ABŞ Prezidenti Ronald Reyqan və Sovet İttifaqının (SSRİ) lideri Mixail Qorbaçov tərəfindən imzalanmışdı. Saziş 500-5500 kilometr mənzilli, qurudan atıla bilən bütün orta mənzilli nüvə və ballistik raketlərin qadağan edilməsini nəzərdə tuturdu.
Ancaq bu ilin əvvəlində ABŞ Rusiyanı yeni tipli raket hazırlamaqda günahlandıraraq sazişi dayandırdığını bildirib. Rusiya isə ABŞ-ın iddialarını rədd edir və Birləşmiş Ştatları sazişi pozmaqda ittiham edir.
ABŞ prezidenti Donald Tramp fevral ayında açıqlamasında ən geci 2 avqusta qədər razılaşmanın şərtlərinə əməl etməyə çağırıb. Rusiya prezidenti Vladimir Putin də ABŞ-ın qərarından dərhal sonra saziş çərçivəsində Rusiyanın öhdəliklərini dayandıran fərmanı imzalayıb.
Bu gün isə Rusiya Xarici İşlər Nazirliyi razılaşmanın başa çatdığını rəsmən elan edib. "Sovet İttifaqı və ABŞ tərəfindən imzalanmış, orta və qısa mənzilli raketlərin məhv edilməsini nəzərdə tutan saziş Amerika tərəfinin təşəbbüsü ilə 2 avqust 2019-cu il tarixindən etibarən qüvvəsini itirmiş sayılır", - açıqlamada bildirilir.
Rusiyadan gələn açıqlamanın ardından ABŞ dövlət katibi Mayk Pompeo da Twitter hesabında ABŞ-ın Rusiyaya verdiyi vaxtın bitdiyini və ölkəsinin razılaşmadan çıxdığını bəyan edib. “Başqaları razılaşmanı pozursa ABŞ bu razılaşmada qalmayacaq" - deyən Pompeo, bütün məsuliyyətin Rusiyanın üzərinə düşdüyünü bildirib.
Məsələ ilə bağlı NATO baş katibi Yens Stoltenberq də yazılı açıqlama yayıb. Açıqlamada deyilir: "INF razılaşmasının müddəti bu gündən etibarən sona çatdı. Razılaşmanın sona çatmasına görə yalnız Rusiya cavabdehdir. ABŞ-ın əməl etdiyi razılaşmaya Rusiya əməl etmir, bu vəziyyət belə davam edə bilməz".
Açıqlamada NATO-nun "ölçülmüş və məsuliyyətli bir şəkildə" Rusiyanın 9M729 raketinin yaratdığı risqlərə cavab verəcəyi bildirilir.
