Gürcüstanın təhlükəsizlik xidməti sabiq prezident, hazırda Odessa vilayətinin qubernatoru Mixail Saakaşvilinin Rustavi-2 televiziyası barəsində iddia edilən çağırışı ilə əlaqəli məlumat almaq üçün Ukraynaya müraciət edib.
İddia olunur ki, internetdə yerləşdirilmiş audioyazıda Saakaşvili telekanalla bağlı hökumət qərarına qarşı itaətsizlik göstərməyə səsləyir.
Lent ehtimalən Saakaşvilinin Rustavi-2-nin direktoru Nika Qvaramiya və müxalif Milli Hərəkat Partiyası liderlərindən biri olan Qiqa Bokeriya ilə söhbəti əks etdirir.
Gürcüstan bu işlə bağlı araşdırmada Ukraynanın yardımına ümid edir, Dövlət Təhlükəsizlik Xidmətinin rəis müavini Levan İzoriya bildirib.
İzoriya hakimiyyətin devrilməsi və zorla ələ keçirilməsi maddələrilə bağlı istintaqın aparıldığını bildirir. "İstintaq çərçivəsində mümkün cinayət əməlinin qarşısını almaq üçün Daxili İşlər Nazirliyi ilə birlikdə artıq bir sıra tədbirlər həyata keçirilib”, - İzoriya bildirib.
"Cari istintaq gedişatında KİV-lərdə yayılan audioyazıların həqiqiliyi müəyyən ediləcək, tələb edilən istintaq tədbirləri keçiriləcək, yazıları və əlimizdəki operativ məlumatları yoxlamaq üçün aidiyyatı olan şəxslər dindirələcək”.
http://uarevo.in.ua saytındakı audioyazıda ehtimalən Rustavi-2 şirkətinin müdafiəsi üzrə addımlar müzakirə olunur. Məhkəmə iddiası qaldıran telekanalın sabiq səhmdarlarından biri, Kibar Xalvaşi Rustavi-2-yə sahiblliyi haqqını qaytarmağa çalışır.
Bu barədə məhkəmə qərarı oktyabrın 22-də qəbul olunmalı idi. Hərçənd ki, iş üzrə hökm hələ də çıxarılmayıb.
Audioyazıda səsi Saakaşvilinin səsinə oxşayan şəxs məhkəmə hökmündən sonra telekanalda barrikadalar quraraq içəriyə heç kəsi buraxmamağı məsləhət görür.
"İnqilabi yolu” seçməyə çağıran şəxs məhkəmə qərarının Xalvaşi xeyrinə olacağını deyir. "Oktyabrın 22-də qərar qəbul olunmalıdır və elə həmin gün o icra olunacaq. Onlar Rustavi-2-ə daxil olacaqlar”, audioyazıdakı səs deyir.
O, həmçinin "hər şeyin atışma” ilə bitəcəyini qeyd edir və Qvaramiya ilə Bokeriyaya müvafiq addımlara hazır olmaq məsləhətini verir.
Yüksək reytinqə malik olan Rustavi -2 kanalı iqtidarın sərt tənqidçisidir. Hazırkı hakimiyyət bildirir ki, telekanal sabiq prezident Mixail Saakaşvilinin yaratdığı vahid Milli Hərəkat Partiyasının maraqlarına xidmət edir. Hökumət kanal ətrafındakı qalmaqala qarışmadığını deyərək məsələni sabiq və hazırkı səhmdarlar arasında mübahisə adlandırır. Müxalifət isə hesab edir ki, iqtidar tənqidçi kanalı susdurmaq niyyətini güdür.
