Ermənistanda böyük konstitusiya dəyişiklikləri üçün referendumun keçirilməsinə iki ay qalmış, Rusiyada yaşayan bir çox varlı ermənilər Ermənistanın siyasi səhnəsinə daxil olub. Bu, Kremlin erməni xalqı üzərində təsir gücünü artırmağa çalışması barədə planlarının olması fərziyyələrinin irəli sürülməsinə səbəb olub.
Baki-xeber.com BBC-yə istinadən xəbər verir ki, Rusiya Erməniləri Birliyinin prezidenti Ara Abrahamyan siyasi partiya yaratmaq fikrində olduğunu və 14 oktyabr 2017-ci ildə keçiriləcək parlament seçkilərində iştirak edəcəyini elan edib.
Ötən ay Rusiyadakı Tashir Şirkətlər Qrupunun sahibi, Samvel Karapetyan, hökumətin elektrik enerjisinin qiymətlərini artırması qərarına qarşı etiraz aksiyalarından sonra Ermənistan elektrik şəbəkəsini satın aldı.
Digər tərəfdən Ruben Vardanyan Ermənistanda iqtisadi, təhsil və mədəni layihələrin həyata keçirilməsində yaxından iştirak edir.
Ermənistanın hakim Respublikaçılar Partiyası biznesmenlərin ölkənin siyasi həyatında yaxından iştirakını alqışlayır. Lakin müxalifət Rusiyanın Ermənistanla bağlı siyasətinin dəyişidiyini güman edir və hesab edir ki, Kreml artıq indiki moskvapərəst Ermənistan hakimiyyətinə güvənmir.
Putinin "adamı"
Müxalifətyönlü media hesab edir ki, Avropa İttifaqının Ermənistanla yeni əməkdaşlıq müqaviləsi imzalamağa hazırlaşdığı bir dövrdə, Ara Abrahamyan İrəvanı qərbyönümlü siyasət yeritməkdən daşındırmağa çalışan Kremlin təsir vasitəsidir.
Onlar inanır ki, Vladimir Putinin "adamı" hesabı edilən Abrahamyan Ermənistan hökümətinin Qərblə yaxınlaşmaq meyllərini dayandıracaq.
Bəzi ekspertlər hesab edir ki, Abrahamyan, bu ilin fevralında prezident olmaq cəhdini bildirən və Prezident Serj Sarkizsyanın konstitusiyaya dəyişiklik etmək planlarına qarşı çıxan və bundan sonra siyasətdən kənarlaşdırılmış yerli varlı biznesmen Qagik Tsarukyanın yerini dolduracaq.
Abrahamyan 2012-ci ildə siyasi partiya yaradaraq Gürcüstanda hakimiyyətə gəlmiş rus-gürcü milyarderi Bidzina Ivanişvili ilə müqayisə edilməsinə qarşı çıxır.
Abrahamyan Rusiyada bir çox biznes fəaliyyəti ilə məşğuldur və investisiya, tikinti və digər xidmət sahələrində uğurlar əldə edib və deyilənə görə, neçə illərdir ki, Rusiyada erməni biznesmenlərini qoruyur. O, həmişə Rusiya və Ermənistan hökuməti ilə yaxşı münasibətdə olub.
Karapetyan qardaşları
Forbs jurnalı bildirir ki, 2015-ci ilin aprel ayına qədər olan məlumatlara görə, Samvel Karapetyanın xalis sərvəti 5 milyard dollar dəyərindədir.
Onun böyük qardaşı Karen Karapetyan məşhur erməni siyasətçisidir və əvvəllər Ermənistan prezidentinin administrasiyasında yüksək vəzifəli məmur kimi çalışıb.
Samvel Karapetyan bu ilin fevralında, Çiçəklənən Ermənistan Partiyasının sədri Gagik Tsarukyanla Prezident Sarkisyanı barışdırmaq və yerli siyasi gərginliyi yatırmaq məqsədilə Moskvadan Yerevana gəlmişdi.
Karapetyanın Ermənistanın siyasi həyatına təsiri, oktyabrın əvvəllərində Rusiyanın sahib olduğu Ermənistan Elektrik Şəbəkəsini aldıqdan sonra əhəmiyyətli dərəcədə artmağa başladı.
Yüksək təhsilli oliqarx
İş adamı və xeyriyyəçi Ruben Vardanyan Broitman and Partners MMC-nin prezidentidir.
O, rəhbərliyi və biznes sahəsindəki bacarıqlarına görə, eləcə də Rusiyanın maliyyə bazarının inkişafına etdiyi əhəmiyyətli töhfələrinə görə bir neçə dəfə beynəlxalq və Rusiyada təsis edilmiş mükafatlara layiq görülmüşdür.
Ruben Vardanyan Ermənistanda əsasən iqtisadi, təhsil və mədəniyyət sahələrindəki layihələrdə iştirak edir. O, iqtisadiyyatın intellektual sektorlarda pul qazanan və eyni zamanda təhsil və elmin inkişafı üçün investisiya edən yüksək təhsilli oliqarx nüfuzuna malikdir.
"Rusiyanın aparıcı qüvvəsi"
Bu üçlük potensial olaraq Ermənistanın siyasi səhnəsində digər qüvvələri kölgədə qoya bilər, müxalifətyönlü Zhamanak qəzeti 16 oktyabrda yazıb.
"Ara Abrahamyanın orta və aşağı təbəqələrdən olan seçiciləri olacaq və onlar ondan faydalanmağa çalışacaqlar. Samvel Karapetyan oliqarxları səfərbər edəcək, Ruben Vardanyan isə elit liberal kütləni öz arxasınca apara biləcək," Zhamanak əlavə edib.
Siyasi ekspert Ağasi Yenokyan bu üç iş adamının "Rusiyanın aparıcı qüvvələri" olaraq, prezident Serj Sarkisyanın əl-qolunu bağlayacaq "dəli köynəyi" rolunu oynayacağını bildirib", Arminfo 21 oktyabrda məlumat verib.
