Türkiyədəki çimərlikdə cəsədi tapılmış üç yaşlı suriyalı oğlanın atası BBC-ə övladının necə dəhşətli vəziyyətdə ölməsindən danışıb.
Aylan Kurdinin atası Abdullah deyib ki, mindikləri qayıq yola düşməyə başlayandan bir neçə dəqiqə sonra hündür dalğalar onu aşırıb, gəminin kapitanı isə qaçıb.
"Uşaqlarımı və yoldaşımı tutmağa çalışdım, amma olmadı. Onlar bir-birinin ardınca öldülər", Kurdi deyir.
Onun ailəsi Suriyada vətəndaş müharibəsindən qaçmağa çalışan ailələrdən biri idi.
"Mən qayığı idarə etməyə çalışdım, amma başqa bir böyük dalğa qayığın üstünə gəldi. Bundan sonra bütün bunlar baş verdi", Kurdi deyib.
O və ailəsi qorxulu səfərə çıxmazdan əvvəl Kanadadan sığınacaq istəyibmiş, lakin onların ərizəsi rədd edilib. Abdullahın bacısı, Vankuverdə yaşayan Tima Kurdi Kanadanın "National Post” qəzetinə deyib ki, o, qohumlarına Yaxın Şərqi tərk etməkdə köməklik göstərməyə çalışırmış.
Abdullahın Kobanenin mühasirəsi zamanı İD cihadçı qruplaşması tərəfindən işgəncələrə məruz qaldığı bildirilir. "Mən onlara yardım etməyə çalışırdım, lakin onları oradan çıxara bilmədik. Elə buna görə də başlarına bu fəlakət gəldi” – deyib Tima.
Bu ailənin Türkiyəni tərk etmək üçün başqa çarəsi qalmadığı xəbər verilir, beləki, mövcud qaydalara görə Suriyadan olan kürd qaçqınların ölkədən çıxmasına yalnız pasportları olduğu halda icazə verilir. Ancaq belə qaçqınların çox az hissəsində pasport olur.
Cəsədləri tapmış yerli balıqçı deyir ki, sahilə gəlib meyitləri aşkar edəndə, ürəyi sıxılıb.
BBC müxbiri Fergal Keane deyir ki, burada cəsədlər tapılandan sonra sahilin bu hissəsi məşhurlaşıb. O deyir ki, burda hər gün çarəsiz insanlara məxsus ən müxtəlif əşyaları görmək olar.
Tima Kurdi Kanada jurnalisti Terry Glavinə bildirib ki, boğulmuş oğlanın atası ailəsini xilas etmək üçün bir xeyli çalışıb. BBC5 Radiosuna müsahibə verən Glavin danışıb ki, ata boğulan ailə üzvləri arasında ora-bura üzürmüş.
Abdullah arvadını və iki oğlunu cəsədlərin arasında tapıb, lakin xanımını əvvəlcə tanıya bilməyb. Cəsəd qayalara çırpılaraq tanınmaz şəklə düşmüşdü.
Qeyd edək ki, Birləşmiş Krallıqda çıxan "The İndependent” qəzeti yazır ki, uşağın fotolarını dərc edib. Qəzetə görə, bir çox qaçqınların üzləşdiyi real müsibətlər çox vaxt "miqrant böhranı” kimi qulağımızı qabar etmiş sözlərin arasında itib-batır.
Save The Children xeyriyyə cəmiyyətinin icraçı direktoru Justin Forsyth deyib ki, bu "faciəli foto daha yaxşı həyat üçün axtarışa çıxan uşaq və ailələrin üzləşdiyi təhlükələr barədə xəbərdarlıqdır”. Onun fikrincə, bu şəkil həm də Avropsa İttifaqına bir çağırışdır ki, liderlər bir araya gəlib qaçqın böhranından çıxış yollarını müzakirə etsinlər.
Ancaq fotoya internetdəki güclü reaksiyaya baxmayaraq, Avropa liderlərindən elə bir münasibət səslənməyib.
Onu da qeyd edək ki, Türkiyə polisi ölümlərlə bağlı dörd nəfəri saxlayıb. Tutulan dörd kişi Suriya vətəndaşıdır və yaşları 30-41 arasındadır. Onlar qanunsuz insan qaçaqmalçılığında ittiham olunur. Aşmış qayıqlarda 12 suriyalı ölüb. Bu il Avropaya çatmağa çalışan minlərlə miqrant ölüb.
