İranın müdafiə naziri Rusiya ilə 4 ədəd S-300 raket sisteminin idxalını nəzərdə tutan müqavilənin gələn həftə imzalanacağını deyib. Hüseyn Dehqan bu barədə yerli mətbuata danışarkən deyib: "Biz gələn həftə müqaviləni imzalamaq üçün Rusiyaya yollanacağıq və bunun qarşısını alacaq heç bir maneə yoxdur”.
Baki-xeber.com xəbər verir ki, İranın Rusiyadan alacağı yeni 4 ədəd S-300 raketdən müdafiə sistemi ümumi qiymətinin 900 milyon dollar olacağı bildirilir. "İnterfax”a məlumat verən mənbələr "İran dörd ədəd S-300 raketdən müdafiə sistemi istəyir. Qiymətlər 900 milyon dollardan az olmaz..." – deyə bildirib.
İyun ayında S-300 komplekslərinin istehsalçısı, "Almaz-Antey” şirkəti yeni müqavilənin imzalandığı təqdirdə Tehranı raket sistemilə təchiz etməyə hazır olduğunu bildirib.
2007-ci ildə tərəflər İrana 5 ədəd S-300 kompleksinin göndərilməsini nəzərdə tutan müqavilə imzalamışdı. Lakin 2010-cu ildə Tehrana qarşı sanksiyaların elanından sonra Moskva 800 milyon dollar dəyərində müqavilənin icrasını dayandırdı.
Müvafiq qərar o vaxtkı prezident Dmitri Medvedyev tərəfindən imzalanmışdı. Rusiyanı öhdəliklərini pozmaqda təqsirləndirən Tehran Rosoboronservis şirkətinə qarşı Cenevrə məhkəməsində iddia qaldırdı. Aprel ayında Kreml raketlərin İrana verilməsini yasaqlayan qərarın ləğv edildiyini bildirdi.
Silah sövdələşməsi Tehranın nüfuzunun artmasından narahat olan ölkələr tərəfindən narahatlıqla qarşılanıb. İsrail Rusiya-İran müqaviləsini öz təhlükəsizliyinə hədə adlandırıb.
