Rusiya prezidenti Vladimir Putinin həftə sonu ailə quran mətbuat sözçüsü Dmitri Peskovun toyunda qolunda görülən bahalı saat müzakirələrə yol açıb. Bu məsələ sosial şəbəkələrdə geniş müzakirələrə səbəb olub. Sual yaranıb ki, illik maaşı 9 milyon rubl olan Peskov belə bahalı saatı necə alıb?
Baki-xeber.com xəbər verir ki, rusiyalı bloqçu, siyasi fəal Aleksey Navalnıy bloqunda Peskovun 620 min dollar dəyərində olduğu deyilən Richard Mille RM 52-01 markalı saatına diqqət çəkib. O dövlət başçısının mətbuat sözçüsü illik maaşının dörd qatı dəyərində olan saatı hansı pullarla alması barədə sual ünvanlayıb.
Bu saat çox yüksək temperatura davamlı, amma çox yüngül titandan, bir də qırmızı qızıldan düzəldilib. Şüşə əvəzinə istifadə olunmuş sapfir kristalı isə işığı əks etdirmir.
Dmitri Peskov isə özünə bəraət qazandırmağa çalışıb: "Bəli, bu saat Tanyanın (həyat yoldaşı Tatyana Navka) hədiyyəsidir və həqiqətən çox bahalıdır. Ancaq bəzi yoldaşların ifadə etdiyi rəqəmdən çox ucuzdur.
Qol saatını mənə həyat yoldaşım bağışlayıb. Mən onun hədiyyəsini toyumuzda taxmaya bilməzdim. Arvadın ərə, ərin arvada hədiyyəsinin heç kimə dəxli yoxdur, bu bizim şəxsi işimizdir" – deyə bildirib.
Peskov saatı yoldaşının öz imkanları ilə aldığını deyib. O qeyd edib ki, bu məsələnin Aleksey Navalnıya, onun məşğul olduğu antikorrupsiya fəaliyyətinə də heç bir dəxli yoxdur.
Korrupsiya ilə Mübarizə Fondu isə Peskovun taxdığı saatdan yalnız 30 ədəd istehsal edildiyini və hər birinin 620 min dollar dəyərində olduğunu iddia edib. thebillionaireshop.com saytında saatın satış qiyməti 527 min 500 avro qeyd edilib.
Peskovun arvadı, tanınmış fiqurlu konkisürən Tatyana Navka da açıqlama verib: "Saatı mən alıb ona bağışlamışam".
Cütlüyün toyu 2014-ci ilin avqustunda Soçidə olub. Saat məsələsi də toy şəkillərinin mətbuata sızmasından sonra ortaya çıxıb.
Tatyana Navkanın hədiyyə etdiyi deyilən qiymətli saatla Peskovun bundan 15 həftə əvvəl çəkilmiş şəkili də ortaya çıxıb. Şəkili (ortada) Peskovun əvvəlki evliliyindən olan 17 yaşındakı qızının paylaşdığı vurğulanır.
