"Uyğur türklərinə oruc tutmaq, ibadət etmək yasaqlanıb. Onların işlətdikləri kafe-restoranlarda 6 növ içki satışı məcburi edilib". Bunu "Azadlıq” radiosuna Dünya Uyğur Qurultayının başqan yardımçısı Seyit Tümtürk deyir.
O, fikrini əsaslandırmaq üçün iyunun 22-də müsəlman uyğurlar yaşayan Qaşqar əyalətində pivə festivalı keçirilməsini misal çəkir: "İnsanların oruclu vaxtında küçədə içki festivalı keçirildi, qarşıdurmada 28 uyğur öldü. Çin polisi nümayişə qatılanlara atəş açdı. Onlara vur əmri verilib”.
"Röyters” agentliyi də bildirir ki, Ramazan ayında müsəlmanların yaşadığı ərazidə pivə festivalı keçirilib.
Seyit Tümtürk uyğurlara Çinin kommunist hakimiyyətinin böyük zülm siyasəti tətbiq etdiyini deyir: "Özəlliklə bu ərazidə ibadətləri, namaz qılmağı, baş ötrüsü, saqqal saxlama kimi yasaqlarla Çin kommunist yönətimi dinsizləşdirmə siyasəti tətbiq edir. Ateist yönətim uyğur türklərini assimlasiya etməyə, həmçinin onları radikal terrorçular kimi təqdim etməyə çalışır”.
Uyğur türkləri ilə Çin Komunist Partiyası arasında qarşıdurma ilk hal deyil. Çinin Sincan əyaləti son 3 ildə Ramazan ayı zamanı daha həssas bir əraziyə çevrilir. Təkcə son 3 ildə burada yüzlərlə adam həyatını itirib, həbs edilənlər olub.
Seyit Tümtürk saxlananlara həbsxanada da işgəncə verildiyini deyir: "Uyğur türkləri həbs edilən zaman onların ailə üzvləri ilə görüşmə şansı yoxdur. Onlara işgəncə verilməsi, ac qalıb-qalmamalarını heç kim bilmir. Vəkil tutmaq hüquqları yoxdur. Hakim sifarişlə gələn cəzanı kəsir. Həbsdən çıxanların da 1-2 ay ərzində ölməsi məlumatları gəlir”.
Çin Kommunist Partiyasının uyğur türklərinə qarşı repressiyaları barədə 60 ildir məlumatlar yayılır. Uzun illərdir ki, Sincan əyalətindəki uyğurlara qarşı etnik ayrıseçkilik edildiyi deyilir. Son bir həftədə 170-dən çox uyğur türkü zülmdən qaçaraq Türkiyəyə sığınması haqda məlumatlar var.
Dünya Uygur Türkləri Konqresinin başkan köməkçisi deyir ki, uyğurlara olan etnik ayrıseçkiliyin səbəbləri müxtəlifdir: "İlk olaraq Çin Doğu Türkistanı işğal edib, ərazini tamamən çinliləşdirmək istəyir. Həm çinli, həm digər etnik kökənli insanlardan olan müxalifəti susdurmaq, öz iqtidarını sürdürə bilmək üçün Doğu Türkistandakı mübarizləri radikal teroristlər kimi təqdim edir, öz əməllərinə haqq qazandırırlar”.
