ABŞ Milli Təhlükəsizlik Agentliyi (MTA) 2006- 2012-ci illərdə Fransa prezidentləri Jal Şirak, Nikolya Sarkozi və Fransua Ollandı izləyib. Bu haqda WikiLeaks saytı məlumat yayıb. Sayt kəşfiyyatların məxfi hesabatlarına və MTA-nın texniki sənədlərinə istinad edib. ABŞ rəsmiləri bu haqda şərh verməkdən imtina edib.
Bir müddət əvvəl Amerika kəşfiyyat idarəsi Almaniya kansleri Angela Merkeli izləməkdə günahlandırılırdı.
Çərşənbə günü WikiLeaks saytı Espionnage Elysee ( Yeliseydə Cəsusluq) adı altında bir çox sənəd yayımlayacaqlarını bildirib. Bildirilir ki, gizli materiallarda 3 fransız prezidenti, fransa nazirləri və ABŞ-da Fransa səfirlərinin kommunikasiya sistemlərinin necə ələ keçirilməsi öz əksini tapacaq.
2012-ci ilə aid sənədlərdən biri Ollandın Yunanıstanın avrozonadan çxmasının mümkünlüyü barəsindəki müzakirələrinə aiddir. 2011-ci ilə aid digər sənəddə isə Sarkozinin ABŞ-ın iştirakı olmadan İsrail və Fələstin arasında sülhü bərqərar etməyə ciddi niyyətləndiyi deyilir.
"Fransa xalqının bilməyə haqqı var ki, seçdiyi hökumət hesab etdiyi müttəfiqi tərəfindən düşməncəsinə izlənib. Biz bu məsələni işıqlandırmağa yardımçı olmuş Fransanın "Liberation” və "Mediapart” nəşrləri ilə əməkdaşlığımızla fəxr edirik. Fransalı oxucularımız yaxın günlərdə daha mühüm ifşalarla tanış olacaqlar”, deyə portalın təsisçisi Culian Assanjın bəyanatında bildirib.
BBC təhlükəszilik müxbiri Gordon Corera bildirir ki, bu sənədlərin MTA-nın keçmiş əməkdaşı Eduard Snouden tərəfindən "oğurlanmış" sənədlərin arasında olub-olmaması hələ ki müəyyənləşdirilməyib.
Gizli məlumatların ortaya çıxmasını şərh edən MTA-nın mətbuat xidmətinin rəhbəri deyib ki, onlar kəşfiyyat idarəsinin fəaliyyəti ilə bağlı hər hansı ittihama şərh verməyəcəklər: "Ümumiyyətlə, biz xaricdə casusluqla məşğul olmuruq. Bu ancaq, ölkənin milli təhlükəsizliyi ilə bağlı dəqiq və əsaslandırılmış vəzifə olarsa mümkündür. Bu həm adi insanlara, həm də ölkə başçılarına aiddir".
Fransa prezidenti Fransua Olland isə Təhlükəsizlik Şurası ilə təcili görüş keçirib. Ollandın çağırdığı təcili toplantıdan sonra Fransa hökumətinin nümayəndəsi Stefan Le Fol bəyan edib ki, Fransa prezidentlərinin ABŞ kəşfiyyatı tərəfindən izlənilməsi tərəfdaşlıq münasibətlərinə ziddidir. Fransa prezident aparatından verilən açıqlamada isə deyilir ki, ABŞ, Fransa prezidentlərini izləməmək barədə vədinə əməl etməlidir.
