Bu gün səhər saatlarında Ermənistan polisi İrəvanın mərkəzində elektrik enerjisi qiymətlərinin qaldırılmasına etiraz əlaməti olaraq keçirilən aksiyanı dağıdıb. Mitinqin amansız dağıdılması zamanı saxlanılanlar arasında jurnalistlər də var (Trend).
Etiraz aksiyasının dağıdılması nəticəsində 240-a yaxın insan həbs edilib, polis şöbələri dolub və saxlanılanların bir hissəsi Abovyan və Aştarakdakı polis şöbələrinə çatdırılıb.
Saxlanılan jurnalistlər arasında "Qala” şirkəti, Azadlıq Radiosunun Ermənistan xidməti, "Aykakan jamanak” qəzeti, "NETQ” nəşri, news.am, panarmenian.net saytlarının əməkdaşları var. Polis əməkdaşları jurnalistlərə qarşı güc tətbiq edib, kameraları sındırıb, məlumat daşıyıcı vasitələri məhv ediblər.
"Armenia Today” xəbər verir ki, polis əməkdaşları saxlanılanlara qarşı şiddət göstəriblər, bir çox vətəndaş xəsarət alıb, onlardan bəziləri xəstəxanalara yerləşdirilib.
"Qala”nın əməkdaşı Paylak Faxradyan bildirib ki, İrəvanın polis rəisi Aşot Karapetyanın yanında dəfələrlə jurnalist olduğunu söyləsə də, ona qarşı güc tətbiq olunub və həbs edilib: "Polislərin gözü qarşısında məni döydülər, həbs etdilər. Bütün üzüm göyərib, burada dəhşətli şeylər baş verir”.
"Aykakan Janamak” qəzetinin əməkdaşı Mkrtiç Karapetyanın sözlərinə görə, polis zorakılıq hallarını kameralara çəkən jurnalistlərə qarşı güc tətbiq edib: "Polis zorakılıq halları ilə bağlı bütün video materialları məhv etmək niyyətində idi”.
Dünyanın əksər media orqanları da Ermənistanda baş verən hadisələrlə bağlı materiallar hazırlayıb (APA). "Associated Press” agentliyi çərşənbə axşamı Ermənistan polisinin elektrik enerjisi qiymətlərinin artmasına etiraz edən və mərkəzi prospekti bağlayan nümayişçiləri güc yolu ilə dağıtmasından və 200 nəfərdən çox adamı həbs etməsindən yazıb: "Bu etirazlar son illər Ermənistanda müşahidə edilən ən böyük iğtişaşlardır. Bu isə yoxsul, keçmiş sovet respublikası olan və Rusiya hərbi bazasının yerləşdiyi Ermənistanla bağlı narahatlıqları artırır. Təxminən 5 min nümayişçi ötən gün prezidentin qərargahına doğru hərəkət edib, lakin çevik polis qüvvələri onların qarşını alıb”.
Agentlik Ermənistan Polis İdarəsinin mətbuat katibi Aşot Aqoronyana istinad edərək 237 nümayişçinin həbs edildiyini açıqlayıb. O bildirib ki, 7 nümayişçi və 11 polis yaralanıb. "Dənizə çıxışı olmayan Ermənistan iqtisadiyyatı Dağlıq Qarabağ münaqişəsinə görə Türkiyə ilə Azərbaycanla sərhədlərin uzun müddət bağlı qalması səbəbindən daha da zəifləyib”.
"Reuters” agentliyi isə yazır ki, İrəvandakı etiraz aksiyaları gənc fəallar tərəfindən təşkil olunub və bunun heç bir siyasi partiya ilə bağlılığı yoxdur: "Onlar hökumətin avqustun 1-dən elektrik enerjisinin qiymətlərini 17-22 faiz artırılması qərarına etiraz ediblər”.
"Frans-Press” isə 3,2 milyon əhalisi olan Ermənistanın Rusiya iqtisadiyyatının zəifləməsindən zərər çəkdiyini önə çəkib. Həmçinin Ermənistanın Rusiya tərəfindən yaradılan Avrasiya Gömrük İttifaqına qoşulması ilə İrəvanın Moskvadan asıllığının artdığı qeyd edilib.
Ermənistanın ikinci böyük şəhəri Gümrüdə də elektrik enerjisinin qiymətlərinin artırılmasına qarşı keçirilən etiraz aksiyası zamanı saxlanılanların sayı 10-a çatıb. "Epress.am” agentliyi xəbər verir ki, dinc aksiya iştirakçıları polis şöbələrinə çatdırılıb. Etirazçıların həbs edilməsinə səbəb kimi onların qanunsuz yerdə maşınlarını saxlamaları və bununla hərəkətə maneə törətmələri göstərilir.
Bu arada Erməni Millli Konqresinin fraksiyası Ermənistan parlamentinin iclasını tərk edib. Bununla müxalifətçi deputatlar İrəvanda polisin dağıtdığı etiraz aksiyasının iştirakçıları ilə həmrəy olduqlarını nümayiş etdiriblər.
Parlamentin iclas zalını ardıcıllıqla fraksiyanın katibi Aram Manukyan, deputatlar Stepan Dəmirçyan, Qaqik Cangiryan və Lyudmila Sarkisyan tərk ediblər.
