Türkiyədə keçirilən parlament seçkiləri nəticəsində təkbaşına hökumət qurmaq üçün kifayət qədər mandat toplaya bilməyən Cumhuriyyət Xalq Partiyasının (CHP) sədri Kamal Kılıçdaroğlu digər müxalifət partiyası olan Millətçi Hərəkat Partiyasına müraciət edib. Lent.az Türkiyə mediasına istinadən xəbər verir ki, Kılıçaroğlu MHP lideri Dövlət Baxçalıya bildirib ki, onunla birgə koalisiya hökuməti qurmağa razıdır.
Kılıçdaroğlu deyib: "MHP ilə koalisiyaya razıyıq. İstəsələr növbəli şəkildə hökumətə rəhbərlik də edə bilərik. Yetər ki, ölkəmiz bu durumdan xilas olsun. Biz bu ölkəni necə birlikdə idarə edə biləcəyimizi göstərək. Bu adi bir koalisiya yox, həm də mövcud rejimi xilas etmək və millətin rahat nəfəs almasını təmin etmək baxımından vacibdir”.
Kılıçdaroğlu Bahçeliyə parlamentdə kürdləri təmsil edən HDP ilə birlikdə koalisiya hökuməti qurmağa razı olacağı təqdirdə baş nazirliyi də verə biləcəklərini qeyd edib.
CHP lideri bildirib ki, seçkilərdən əvvəl 30 faizə yaxın səs toplayacaqlarına ümid edib. Lakin bəzi səbəblərdən bu baş tutmayıb. Kılıçdaroğlu son vaxtlar partiyanın bəzi yerlərdə səs itirdiyini də etiraf edib.
Qeyd edək ki, son seçkilərdə CHP 25 faiz səslə 132 deputat mandatı qazanıb. Digər müxalifət partiyaları olan HDP və MHP isə hərəyə 80 mandat əldə edib.
