Yunanıstan hökuməti İkinci Dünya Müharibəsi illərində alman işğalına görə təzminat kimi ölkədə Almaniyaya məxsus mülkiyyəti müsadirə etməklə hədələyib. Ədliyyə naziri Nikos Paraskevopulos 218 qurban qohumlarına kompensasiya ödənilməsini tələb edən Ali Məhkəmənin 2000-ci il tarixli qərarını imzalamağa hazır olduğunu bəyan edib.
Ağır maliyyə vəziyyətində olan Yunanıstan hökuməti Almaniyadan milyardlarla avro məbləğində təzminat tələb edir. Lakin Berlin kompensasiya məsələsinin hələ 1990-cı ildə, iki Almaniya birləşməzdən əvvəl həll olunduğunu təkid edir.
Kansler Angela Merkelin nümayəndəsi Steffen Seibert çərşənbə günü bəyan edib ki, Almaniya təzminat məsələsinin hüquqi və siyasi baxımdan həll olunduğuna qəti əmindir.
"Biz diqqətimizi cari problemlər üzərində cəmləşdirməliyik”, - Yunanıstan maliyyə böhranına işarə edərək, Seibert deyib.
Çərşənbə axşamı parlamentdə çıxış edən Yunanıstan baş naziri Aleksis Tsipras 1940-44-cü illərdə nasist işğalı nəticəsində yetirilən zərər üçün təzminatlar məsələsini qaldırmağa borclu olduğunu bəyan edib və qeyd edib ki, 1990-cı ildə birləşdiyi məqamdan Almaniya, onun fikrincə, gizlətmə, hüquqi hiylə və ləngitmə taktikasını tətbiq edir. Lakin hazırda ədliyyə naziri daha uzağa gedərək, 10 iyun 1944-cü ildə Distomo kəndində 218 sakinin qətlə yetirilməsinə dair Ali Məhkəmənin 2000-ci il tarixli qərarını qüvvəyə gətirməyə hazır olduğunu bəyan edib.
O zaman məhkəmə Almaniyanı həlak olanların qohumlarına 28 milyon avro ödəməyə məcbur edən qərar çıxarmışdı. Lakim bu qərar reallaşdırılmayıb, iş isə sonrakı illərdə beynəlxalq məhkəmə instansiyalarında "yaddan çıxarılmışdı”.
Bu qərar Yunanıstan ərazisində Almaniya mülkiyyətini kompensasiya əvəzinə müsadirə etməyə imkan verirdi, lakin bu tədbirlər o vaxtkı ədliyyə naziri Mixalis Statopulos tərəfindən elə də gerçəkləşdirilməmişdir.
