"Ukraynada bütün sərhəd boyu atəşkəs rejiminə əməl olunur. Debaltsevo isə istisna olaraq qalır”. APA-nın Moskva müxbirinin verdiyi məlumata görə, bunu Rusiyanın xarici işlər naziri Sergey Lavrov deyib.
Onun fikrincə, əsas vəzifə atəşin dayandırılmasıdır: "Bir çox yerlərdə könüllülər ağır texnikanı geri çəkməyə hazır olduqlarını bəyan ediblər. Debaltsevoda isə döyüşlər davam edir. Biz Minskdə dedik ki, Ukrayna qoşunları Debaltsevoda mühasirəyə düşüb. Onların Debaltsevonu necə tərk edə biləcəyi barədə danışmaq lazım olduğunu söylədik. Söhbət ondan gedirdi ki, onlar ağır texnikanı qoyaraq oranı şərəflə tərk etsinlər. Kiyev isə buna hazır deyildi. Lakin könüllülər əvvəlcədən bildirmişdilər ki, ağır texnikanın Debaltsevodan çıxarılmasına icazə verməyəcəklər. Onların fikrincə, əks təqdirdə Ukrayna qoşunları geri qayıdacaq və yenidən atəş açacaq. Poroşenko isə onda bildirdi ki, Ukrayna ordusu Debaltsevoda mühasirədə deyil. Nəticədə isə belə alındı”.
S. Lavrov Debaltsevo olayının Rusiyaya qarşı təzyiq göstərmək və yeni sanskiyalar tətbiq etmək üçün ABŞ-ın əlində bir bəhanə olduğunu söyləyib: "Qərb siyasətçiləri Ukrayna böhranının nizamlanmasına kömək etməlidirlər, ziddiyəti daha da alovlandırmamalıdırlar. Ümid edirəm ki, Qərbdə olan məsuliyyətli siyasətçilər Ukrayna xalqının maraqlarına uyğun əllərindən gələni edəcəklər”.
Rusiyalı nazir qeyd edib ki, ABŞ-ın vitse-prezidenti Co Baydenin Minsk razılaşmalarının yerinə yetirilməyəcəyi təqdirdə Rusiyaya qarşı yeni sanksiyaların tətbiq olunacağının mümkünlüyü ilə bağlı sözləri Vaşinqtonun qeyri-konstruktiv yolda olduğunu təsdiqləyir: "Biz Bayden üçün ənənəvi olan bəyanata növbəti hədə-qorxu kimi baxırıq. Yəqin o demək istəyib ki, ABŞ Rusiyadan buna görə cavab verməsini, o cümlədən Avropa İttifaqı ölkələrindən məcburetmə yolu ilə öz mövqelərini sərtləşdirməyi tələb edəcək. Debaltsevo bir bəhanədir. Biz hələ fevralın 11-də bu problemin nizamlanmasının vacibliyi barədə demişdik. O zaman bizə dedilər ki, Debaltsevoda heç bir problem yoxdur. Lakin gördüyünüz kimi, problem var. Ona görə də, buna Vaşinqtonun növbəti qeyri-konstruktiv xətti kimi baxıram”.
