İŞİD-in həyatları qarşılığında Yapon hökumətindən böyük miqdarda pul istədiyi iki Yapon girovdan biri - Haruna Yukavayı öldürdüyü iddia edilir. Terrorçular bununla bağlı video yayıb, ancaq bu görüntülərin doğru olub-olmadığı hələlik təsdiqlənmir. Təşkilat Yukavanın ölümündən sonra girovlara görə istədiyi pulu 200 milyon dollardan 2 milyona endirib.
Baki-xeber.com xəbər verir ki, İŞİD görüntülərdə yeni bir tələb də irəli sürür. Belə ki, 2005-ci ildə Əmmanda təxminən 60 nəfərin ölümü ilə nəticələnən bombalı hücumların şübhəlisi Sacide Rişavinin İordaniyada saxlandığı həbsxanadan çıxarılmasını istəyirlər.
İŞİD narıncı paltar geydirilən və dizləri üzərinə çökmüş yapon girovlar - Haruna Yukava və Kenji Goto Jogonun görüntülərini yanvarın 20-də yayıb. Görüntülərdə onların arxasında qara paltar geyinmiş ingilis John kimi tanınan İŞİD üzvü, ingiliscə danışaraq, yapon hökumətinin Yaxın Şərqdən 8 min 500 km uzaqda olduğu halda ABŞ liderliyindəki koalisiyaya dəstək verməsini tənqid edirdi.
Girovların həyatlarına qarşılıq Yaponiya hökumətindən 200 milyon dollar istənilən videoda, pulu ödəmək üçün 72 saat vaxt verilmişdi.
Girovlardan Goto sərbəst jurnalist kimi işləyir. Əfqanıstandan Afrikaya qədər olan bölgədə müharibə bölgələrində olub və uşaqlarla bağlı bir kitabın müəllifi olan Goto, bəzi Yapon media orqanları ilə də əməkdaşlaq edirdi.
Avqust ayında «Reuters»ə açıqlama verən Goto, digər girov Yukava ilə keçən il tanış olduğunu və iyunda ona İraqa getməsi üçün kömək etdiyini bildirib.
İki gün əvvəl isə Gotonun anası Junko Işido oğlunu sərbəst buraxması üçün gözyaşları içində İŞİD-ə müraciət etmişdi. Gotonun anası bildirirdi: "Oğlum müsəlman düşməni deyil. Bir ana olaraq bu an edə biləcəyim tək şey sərbəst qalması üçün dua etməkdir… Onun sərbəst qalması qarşılığında öz həyatımdan keçə bilərəm. Belə bir şeyin mənim üçün sözü belə olmaz".
Oğlunun bölgəyə yalnız yoldaşını (digər girov Haruna Yukava) qurtarmaq üçün getdiyini vurğulayan Işido, "Beynəlxalq cəmiyyətə mənsub fərdlər kimi, İŞİD üzvlərilə bir-birlərini anlaya biləcəklərini düşünürdü" – deyə bildirib.
