Sony Pictures şirkəti üzərinə kiberhücumlara görə söz müharibəsinin qızışması əsnasında Şimali Koreya Birləşmiş Ştatları təfərrüatları açıqlanmayan hücumlarla hədələyib. Bu barədə acıqlı bəyanatında Şimali Koreya Ağ Ev, Pentaqon və "bütün ABŞ ərazisinə” basqınlarla hədələyir.
Şimali Koreya öz lideri Kim Jong-un-un ölümünü təsvir edən bədii filmlə əlaqələndirilən kiberhücumların arxasında olması barədə ABŞ-ın iddialarını rədd edir.
Şimali Koreya əvvəllər də ABŞ-a qarşı hədələr səsləndirib.
Son bəyanat Birləşmiş Ştatlar Sony Pictures üzərinə sürəkli hücumlara görə Şimali Koreyanı rəsmən ittiham edəndən bir neçə gün sonra verilib. "KXDR-in ordusu və xalqı kibermüharibə sahəsi də daxil olmaqla, ABŞ-la bütün müharibə növlərində qarşıdurmaya tam hazırdır” – Koreyanın rəsmi Mərkəzi Xəbərlər Agentliyinin yaydığı uzun bəyanatda deyilir.
"Bizim əks-reaksiyamız Obama tərəfindən elan edilmiş "simmetrik cavab”ın hüdudlarını aşan cəsarətli bir şəkildə Ağ Evi, Pentaqonu və terrorun yuvası olan ABŞ-ın ərazisini hədəfləyəcək” – bəyanatda bildirilir.
Bəyanat prezident Obamanı Sony üzərinə hücumun arxasında Şimali Koreyanın dayanmasına dair "məsuliyyətsiz bir şəkildə şaiyə düzəltməkdə” ittiham edir. Daha sonra bildirilir ki, Şimali Koreya Sony hakerlərinin harada olduqlarını bilməsə də, "onların hərəkətini tamamilə ədalətli” hesab edir.
"Müsahibə” - Interview - filmində cənab Kimlə müsahibə icazəsi almış James Franco və Seth Rogen adlı iki jurnalistdən bəhs olunur. Mərkəzi Kəşfiyyat İdarəsi jurnalistləri Kimə qarşı sui-qəsdə cəlb etmək istəyir.
Sony bildirib ki, filmin nümayişini ləğv etmək qərarını terror hədələrinin ardınca əksər ABŞ kinoteatrlarının bundan imtina etməsindən sonra qəbul edib.
22 noyabr: Sony şirkətinin kompüter sisteminə haker müdaxiləsi baş verir və kino ulduzları barədə pərtlik yaradan elektron məktublar və şəxsi məlumatlar faş olur.
7 dekabr: Şimali Koreya kiberhücumun arxasında olduğu barədə ittihamları rədd edir, lakin bu hücumu "düzgün əməl” adlandırır.
16 dekabr: "Sülhün Keşikçiləri” haker qrupu filmi nümayiş etdirəcək kinoteatrların üzərinə 11 sentyabr basqınlarına bənzər hücum ediləcəyi ilə hədələyir, filmin Nyu York premyerası ləğv olunur.
17 dekabr: ABŞ-ın aparıcı kinoteatr şirkətləri filmi göstərməyəcəklərini bildirirlər və Sony Milad buraxılışını ləğv edir.
19 dekabr: FTB haker hücumunun Şimali Koreya tərəfindən təşkil olunması barədə nəticəyə gəlir. Prezident Obama Sony-nin filmi nümayiş etdirməmək qərarını "səhv” adlandırır.
